नेपालमण्डल कि नेवाः–ताम्सालिङ ?

येँ- प्रदेशया नामाकरण यायेगु लागिं थीथी प्रदेश दुने गतिविधित सुरु याना हयेवं ३ नम्बर प्रदेशया नां छु तयेगु धइगु खँय् नेवाः आन्दोलनकारी खलः पुचःतय् दथुइ हे विवाद पिहां वःगु दु । प्रदेशया नां पहिचानय् आधारित जुयाः तयेमाः धाइपिं खलः पुचः व बुद्धिजीवीतय् दथुइ हे थ्व विवाद पिहां वःगु खः । पहिचानय् आधारित जुयाः नां तयेबलय् ‘नेवाः–ताम्सालिङ’ तयेगु कि ‘नेपालमण्डल’ तयेगु धइगु खँय् थ्व विवाद पिदंगु खः ।

नेवाःतय् राष्ट्रिय संगठन नेवाः देय् दबू नेवाः व ताम्सालिङ निगुलिं जाति मिले जुयाः ‘नेवाः–ताम्सालिङ प्रदेश’ तयेमाः धकाः अभियान हे न्ह्याकाः न्ह्याः वनाच्वंगु दुसा नेवाः ख्यःया मेमेगु खलः पुचःत धाःसा ‘नेवाः–ताम्सालिङ’ नां तइगु सम्भावना मदुगु जुयाः ऐतिहासिक पृष्ठभूमिया आधारय् ‘नेपालमण्डल’ तयेमाः धइगु पक्षय् वनाच्वंगु दु ।

तर आः लिपांगु इलय् तामाङत नेपालमण्डल नांया पक्षय् खने मदुगु जुयाः नेवाः–ताम्सालिङ हे तयेमाः धइगु तर्क न्ह्यःने दना वःगु दु । तर तामाङ समुदायं छाय् नेपालमण्डल नांयात अस्वीकार यात धइगु खँ धाःसा प्रस्ट याःगु मदुनि ।

उखे ३ नम्बर प्रदेशय् धाःसा थीथी पार्टीइ च्वंपिं नेवाः सांसदतय्सं नेपालमण्डल नां स्वीकार याकेगु लागिं लबिङ यानाच्वंगु दु । वय्कःपिनि धापू कथं सदनं नेवाः–ताम्सालिङ नांयात स्वीकार याइगु ला सम्भावना हे मदु, नेपालमण्डल तक नं बल्लबल्ल जक हे स्वीकार याइगु खनेदु । यदि थथे विवाद पिहां वयाच्वन धाःसा ‘नेपालमण्डल’ नां नं वये फइगु खने मदु ।

थौंकन्हय् सदनय् थ्व प्रदेशया नां बागमति, पशुपति, राजधानी, नारायणी आदि प्रदेश तयेमाः धाइपिनि ल्याः नं अप्वया वयाच्वंगु दु ।

विशेष अभियान न्ह्याकीगु
येँ – ३ प्रदेशया नां ‘नेवाः–ताम्सालिङ प्रदेश’ घोषणा याकेगु लागिं आः विशेष अभियान हे न्ह्याकेगु तयारी नं सुरु जूगु दु । थुकिया लागिं जिल्ला जिल्लाय् हे नेवाः–ताम्सालिङ समन्वय समिति गठन यायेगु ज्या न्ह्याकूगु दु । थौं यल जिल्लास्तरीय नेवाः–ताम्सालिङ समन्वय समिति गठन यायेत्यंगु दुसा कन्हय् ख्वप जिल्लास्तरीय व कंस येँ जिल्लास्तरीय नेवाः–ताम्सालिङ समन्वय समिति गठन यायेत्यंगु दु ।

अथे हे थुकिया नापं काभ्रे, नुवाकोट, रसुवा व धादिङय् नं नेवाः–ताम्सालिङ जिल्ला समन्वय समिति गठन यायेगु लागिं तयारी जुइधुंकूगु खँ सीदुगु दु ।

थ्व प्रदेशया नां नेवाः–ताम्सालिङ प्रदेश तयेकेगु अभियान सञ्चालनया लागिं जिल्ला जिल्लाय् थ्व समन्वय समिति गठन याःगु खः । थ्व ज्याय् पुलांगु एमाले व पुलांगु माओवादीया नेवाः भातृ संगठन, तामाङ भातृ संगठनय् आवद्ध नेवाः व तामाङ कार्यकर्तात सक्रिय जुयाच्वंगु दु । थ्व अभियान अन्तर्गत आः प्रदेशन्यंकं हे समन्वय समिति गठन यानाः थीथी ज्याझ्वःत न्ह्याकेगु ताः तयातःगु दु ।