आः अय्लाः व लागू वासः नियन्त्रण अभियान

येँ – वासः निषेधयात नं अभियानया रुपय् न्ह्याकेत्यंगु खः । गृहमन्त्री रामबहादुर थापां थम्हं कार्यभार कःघायेधुंकाः सछिन्हुया दुने जूगु उपलब्धिया जानकारी बीगु झ्वलय् आः उकथंया अभियान न्ह्याकेगु धयादीगु खः ।

कार्यभार ग्रहण यानागु सछिन्हुया दुने साढे ३३ किलो लुँ तस्करकान्डया गिरोहयात ज्वनेगु, आयोजना निर्माणय् ढिलासुस्ती व कमसल ज्या याइपिं ठेकेदारयात कारवाही, ट्राफिक व्यवस्थापनया ज्या, न्हय्गुलिं प्रदेशय् सुरक्षा व्यवस्थायात प्रादेशिक सुरक्षा व्यवस्था गोष्ठि, ताःई न्ह्यवंनिसें दिनाच्वंगु नेपाल प्रहरी व सशस्त्र प्रहरीया सरुवाबढुवा नियमित यानागु, विदा कटौति, सरकारी सवारी साधन दुरुपयोग लगायतय् उपलब्धिइ हासिल यायेधुंकाः आः उकथंया अभियान न्ह्याकेगु वय्कलं धयादीगु खः ।

अथे हे वय्कलं आन्तरिक सुरक्षा ऐन, २०७५, नागरिकता ऐन संशोधन, परिचयपत्र व्यवस्थापन ऐनय् सहमतिया निंतिं कानुन मन्त्रालयय् छ्वयेधुंगु व संघीय प्रहरी ऐनया मस्यौदा नं अन्तिम चरणय् थ्यने धुंकूगु धयादीगु दु ।