‘नेपालमण्डल’ य् दाहालया समर्थन

तर थ्वहे नां च्वनी धकाः ढुक्क जुइ मफइगु बिचाः

येँ – सत्तारुढ पार्टी नेपाल कम्युनिष्ट पार्टी (नेकपा) या अध्यक्ष पुष्पकमल दाहालं ३ नम्बर प्रदेशया नां ‘नेपालमण्डल’ तयेगु खँय् थम्हं माःगु पहल यायेगु बचं बिसें तर थ्वहे नां च्वनी धइगु खँय् ढुक्क धाःसा जुइ फइ मखु धयादीगु दु । वय्कलं धयादीगु दु, ‘जितः ला नेवाः प्रदेश अथवा नेवाः–ताम्सालिङ हे नां तःसां आपत्ति मदु ।

तर थ्व नां भचा जातीय जुल धइगु खँ वयाच्वंगु दु । उकिं नेपालमण्डल दथुइ सहमति जुइगु नां जुइफु ।’पद्मरत्न तुलाधरया ज्याजंक्वया लसताय् जुइगु ज्याझ्वलय् ब्वति कायेत इनाप यायेया लागिं वय्कःयात नापलाः वंपिं नेपालभाषा आन्दोलनया न्ह्यलुवापिंलिसे म्हिगः खँ ल्हायेगु झ्वलय् वय्कलं थ्व खँ कनादीगु खः ।

नेपालमण्डल नांया लागिं थम्हं जिउथाय् तक पहल याये धासें तर थ्वहे नां च्वनी धइगु खँय् ढुक्क धाःसा जुइ फइ मखुनि धकाः नं वय्कलं धयादिल । नेपालमण्डल नां तयेबलय् सकलें नेवाः लगायत तामाङ समुदाययात नं आपत्ति जुइ मखु जुइ धकाः नं वय्कलं आशा प्वंकादिल ।

छुं ई न्ह्यः ४ नम्बर प्रदेशया नां तयेगु झ्वलय् ‘गण्डकी’ तयेगु धकाः खँ वःगु खःसा अन स्थानीय आदिवासी जनजातिया पहिचान पिलुइ कथं ‘गण्डकी–तमू’ तये धयाबलय् तकं तसकं विरोध वयाः तये मफुगु जूगुलिं ३ नम्बर प्रदेशया सवालय् नं अथे हे जुइ फइगु संकेत नं वय्कलं यानादिल ।

आः ७ नम्बर प्रदेशया नां ‘सेती–महाकाली’ जुइगु निश्चित जूगु व थ्वहे अनया पहिचान खः धकाः खँ पिहां वःगु जानकारी नं वय्कलं यानादिल । आः प्रदेशया नां तयेगु सवालय् खँ पिहां वइबलय् थुकिं नकतिनि जूगु पार्टी एकता प्रक्रियायात नं लिच्वः मलाइ कथं ज्या यायेमाःगु अवस्था दुगु खँ नं वय्कलं कनादिल ।

पद्मरत्न तुलाधरया ज्याजंक्वया लसताय् जुइगु ज्याझ्वलय् थः न्ह्याथे यानाः नं सहभागी जुइ धासें नेपाःया समग्र शान्ति प्रक्रिया व लोकतान्त्रिक आन्दोलनय् वय्कःयात गनं हे लिउने लाके मजिउगु थःगु बिचाः नं वय्कलं तयादिल । वय्कःयात नापलायेत पद्मरत्न हना ज्याझ्वःया निर्देशक पुचःया संयोजक लक्ष्मीदास मानन्धर लिसें दुजःपिं दुर्गालाल श्रेष्ठ, भृगुराम श्रेष्ठ, मल्ल के. सुन्दर लिसें मेपिं दुजःपिं झाःगु खः ।