किपुली बुंगद्यः तःगु खँय् बुंगया पाञ्जुपिनि आपत्ति

यल (नेपालभाषा टाइम्स)-किपूया गःछेँस्थित प्यंगःथां धाःगु थासय् बुंगद्यः व याकः मिसाया मूर्ति पलिस्था याःगु खँय् बुंगय् च्वंपिं पाञ्जुतय्सं आपत्ति प्वंकूगु दु । किपुली उगु मूर्ति तःगु इलय् हे विरोध याना वयाच्वंपिं बुंगया पाञ्जुतय्सं आः धाःसा छगू विज्ञप्ति हे जारी यासें उगु ज्याया विरोध याःगु खः ।

बुंगया ‘श्री ह्यगृव भैरवनाथ तथा ३२ पानेजु संघ’ पाखें नायः यज्ञरत्न शाक्यं जारी यानादीगु उगु विज्ञप्तिइ किपुली बुंगद्यः व याकः मिसाया मूर्ति पलिस्था यायेगु ज्यां थ्व सम्बन्धी अमूर्त सम्पदाय् लिच्वः लाकूगु खँ धयादीगु दु ।

यदि किपुली नकतिनि पलिस्था याःगु उगु मूर्ति अनं मचीकल धाःसा दँय्दसं बुंगद्यः जात्राया झ्वलय् पाञ्जुपिंसं किपुली वनाः स्वां प्रसाद तः वनेगु ज्या हे बन्द यायेगु ख्याच्वः तकं विज्ञप्तिइ बियातःगु दु ।
किपुली स्वां प्रसाद तः वनेगु झ्वलय् अनया छम्ह जीवित मिसायात हे प्रसाद लःल्हाइगु जूगुलिं वहे थासय् वयागु मूर्ति तये मजिउगु खँ विज्ञप्तिइ धयातःगु दु । अथे हे किंवदन्ती कथं बुंगद्यः थः वने मलानाः पाञ्जुपिंत प्यंगःथामय् स्वां प्रसाद तयेके छ्वइगु खः । आः अन बुंगद्यःया मूर्ति हे विराजमान जुइधुंसेंलि स्वां प्रसाद तः वनेमाःगु आवश्यक नं मजूगु खँ विज्ञप्तिइ धयातःगु दु ।
लिसें विज्ञप्तिइ किपूया याकः मिसायात बुंगद्यःया यज्जु धकाः प्रचार यानाच्वंगु नं मिले मजूगु खँ धाःगु दु ।

यलया कलाकार रवि शाक्यं दयेकूगु थ्व मूर्ति छुं ई न्ह्यः तिनि यलया महाबौद्धं शोभायात्रा यानाः किपूया प्यंगःथामय् दयेकातःगु न्हूगु छेँय् पलिस्था याःगु खः । मूर्ति दयेकेत येँ मनपां नं आर्थिक ग्वाहालि याःगु खः ।