परियत्ति शिक्षाय् ताःलाःपिंत सिरपाः व दसिपौ

ख्वप- मैत्रेय युवा संघपाखें बुद्ध संवत् २५६१ दँय् केन्द्रपाखें परियत्ति शिक्षाय् उत्तीर्ण जूपिं विद्यार्थीतय्त छगू ज्याझ्वःया दथुइ सिरपाः व दसिपौ लःल्हायेगु ज्या जुल ।
मैत्रेय युवा संघया नायः संचित बुद्धाचार्यया सभापतित्वय् भिक्षु पियदर्शी स्थविरया प्रमुख आतिथ्यताय् न्ह्याःगु ज्याझ्वय् सल्लाहार लक्ष्मीचन्द्र वज्राचार्यं लसकुस यानादीगु खः ।
सुलोचना कोजु व मुनि विहार परियत्ति केन्द्रपाखें कोविद पास यानादीम्ह प्रज्ञा शाक्यं परियत्ति शिक्षाया महत्वया विषयय् कनादीगु खः । ज्याझ्वलय् परियत्ति शिक्षाया विषयय् राधेश्याम बासुकला, लुम्बिनी भ्रमण व थुगुसीया स्वांयाःपुन्हिया लसताय् लुम्बिनीइ जूगु अन्तर्राष्ट्रिय बौद्ध सम्मेलनया विषयय् अणु शाक्य नं नवानादीगु खः ।
ज्याझ्वलय् भक्तपुर बौद्ध सम्पदा संघया संस्थापक नापं निवर्तमान नायः पद्मसुन्दर शाक्यं परियत्ति शिक्षा आः राज्यस्तरं हे न्ह्याकेमाःगु खँय् बः बियादिल । ज्याझ्वलय् परियत्ति प्रशिक्षकपिंत चैत्य व नगद सिरपाः नं लःल्हाःगु खःसा दाता संघरत्न शाक्यं परियत्ति शिक्षा विद्यार्थीस्तरय् जक मखसे अभिभावकं नं ब्वनेमाःगु विचाः तयादीगु खः ।
संघया विशेष दुजःपिं प्रेमशोभा वज्राचार्य, दानलक्ष्मी वज्राचार्य व गौरी श्रेष्ठपिं चैत्य लःल्हानाः सम्मान याःगु ज्याझ्वलय् मैत्रेय परियत्ति केन्द्रया केन्द्राध्यक्ष तीर्थराज वज्राचार्यं परियत्ति शिक्षायात सरकारी शिक्षाया पाठ्यक्रमय् नं दुथ्याकेत परियत्ति प्रधान कार्यालयपाखें जुयाच्वंगु कुतः म्हो जूगु धासें दुःख प्वंकादिल ।
अखिल नेपाल भिक्षु महासंघपाखें न्ह्यानाच्वंगु नेपाल बौद्ध परियत्ति शिक्षा अन्तर्गत बुद्ध संवत् २५६१ लय् केन्द्रपाखें परीक्षाय् सहभागि जूपिं २२ म्ह विद्यार्थी मध्ये २१ म्ह सफल जूगु खः । केन्द्रपाखें परीक्षाय् सफल विद्यार्थीमध्ये सुलोचना कोजु प्रवेश तृतियय् बोर्ड द्वितीय प्राप्त यानादीगु खः ।
अथे हे ईजी पायोनियर स्कुलया आस्था गोरा प्रारम्भिक द्वितीयय् बोर्ड प्रथम जुयादीगु खः ।