लःया रोयल्टी माग

येँ – लमजुङया आदिवासी जनजातिं लःया रोयल्टी माः धासें म्हिगः जिल्ला प्रशासन कार्यालयय् ज्ञापनपत्र बिउगु दु । उमिसं माथिल्लो मस्याङ्डी आयोजना दयेकेगु झ्वलय् थःपिंत उचित क्षतिपूर्ति बीमाःगु माग याःगु खः । ज्ञापनपत्र लःल्हाये न्ह्यः जिल्ला प्रशासन कार्यालयय् उमिसं धर्ना नं बिउगु खः ।

स्थानीय जनतां अन्तर्राष्ट्रिय सन्धि आईएलओ १६९ प्रावधानयात कार्यान्वयन यायेमाःगु माग यासें थःपिनिगु भूभागय् जुइगु गुगुं नं विकास निर्माणया ज्याय् थःपिंत न्हापांगु प्राथमिकता बीमाःगु माग नं उमिसं याःगु दु ।

लमजुङ जिल्लाय् आपालं जलविद्युत आयोजना दयेकेगु ज्या जुयाच्वंगु धासें उकियापाखें जुइगु आम्दानीया छुं निश्चित प्रतिशत दां थःपिनिगु जिल्ला विकास निर्माणय् छ्यलेमाःगु माग नं याःगु दु ।