८ लेनया खँ ठेगान मदुनि

येँ – सूर्य विनायक–धौख्यः ८ लेनया सतक विस्तारया ज्या गबलय् न्ह्याइ धइगु बारे अनिश्चित जूगु दु । आः तक थुुगु सतक विस्तारया निंतिं जापानी सहयोग नियोग (जाइका) लिसे सम्झौता जूगु मदुनि । थुगु सतक खण्ड विस्तारया निंतिं जाइकां सरकारयात स्वंगू विकल्प सहित प्रारम्भिक अध्ययन रिपोर्ट लःल्हायेधुंकूगु दु ।

तर, गुगु विकल्प नालेगु धइगु बारे निर्णय मजूगुलिं सतक विस्तारया ज्या न्ह्याये फयाच्वंगु मदुनि । उगु सतकया पलाँसे–साँगा भञ्ज्याङ खण्डय् सुरुङ मार्ग नं दयेकेगु विकल्प जाइकाया प्रतिवेदनय् दु । लिसें प्रतिवेदनय् आः कायम जुयाच्वंगु रुटयात विस्तार यायेगु वा पलाँसे–साँगाय् मेगु वैकल्पिक सतक चायेकेगु धइगु विकल्प नं न्ह्यथनातःगु दु ।

सडक विभागया कथं थौंकन्हय् भौतिक पूर्वाधार मन्त्रालय, अर्थ मन्त्रालय व सरोकारवाला निकाय लिसे थुगु सतक मार्गया विस्तार गुकथं यायेगु धइगु बारे सहलह जुयाच्वंगु दु । तर, निर्णय धाःसा यायेत ई काइगु खँ धाःगु दु । सरकारं थ्व सतक फयांफछि जापान सरकारं अनुदानय् दयेका बिउसा जिउ धइगु बिचाः तयेगु यानाच्वंगु दु । तर जापानं अनुदान स्वयां नं सहुलियत त्यासां दयेकेगु बिचाः तयाच्वंगु दु ।