सार्वजनिक चःबिया निंतिं सम्झौता
येँ(नेपालभाषा टाइम्स)÷ नबिल बैंकं थःगु ज्याकूया चःबि सार्वजनिक प्रयोगया निंतिं छ्ययेके बीगु जूगु दु । थ्व सम्बन्धय् येँ महानगर व बैंक दथुइ छगू सम्झौता जूगु दु ।
महानगरया प्रमुख प्रशासकीय अधिकृत लोकनाथ पौड्याल व नबिल बैंकया प्रमुख कार्यकारी अधिकृत अनिलकेशरी शाहं बैंकया ज्याकुथिइ च्वंगु चःबि सार्वजनिक प्रयोगया निंतिं छ्ययेके बीगु सम्बन्धी सम्झौता पती ल्हाःचिं तयादीगु खः । सम्झौताकथं आः बैंकं थःगु ज्याकुथिइ च्वंगु चःबिइ ‘सार्वजनिक शौचालय’ संकेतया चिन्ह स्पष्ट खने दयेक तइगु जूगु दु । उगु बोर्डय् चःबिया संकेत बाहेकं मेगु छुं कथंया प्रचार सामग्री तये दइमखु ।
न्यादँया निंतिं जूगु सम्झौताकथं थ्व अवधिइ बैंकं थःगु केन्द्रीय ज्याकूलिसें दक्वं शाखा ज्याकूया चःबि आवंलि सार्वजनिक प्रयोगया निंतिं उपलब्ध याकीगु जूगु दु । थुकथं उपलब्ध याकूगु चःबिया आवश्यक सुचुकुचु, मर्मत सम्भार, लःया व्यवस्था यायेगु नापं चःबि सुगन्धित याना तयेगु निंतिं आवश्यक सामग्रीया व्यवस्था नं बैंकं हे याइगु जूगु दु । चःबि प्रयोग वापत बैंकं गुगुंकथंया बाध्यता सिर्जना यायेगु, करकाप यायेगु वा अन्यकथंया ज्या या याये दइमखु ।
सम्झौताकथं चःबि सार्वजनिक प्रयोगया निंतिं संचालन जुयाच्वंगु दु वा मदु धइगु अनुगमन व मूल्यांकन नं याइगु जूगु दु । उकिया निंतिं निगुलिं पक्षं छम्ह छम्ह प्रतिनिधिया व्यवस्था याइगु व इमिसं प्रत्येक प्यलाय् छक्वः प्रतिवेदन बीगु खँ सम्झौता पती न्ह्यथनातःगु दु ।
सम्झौता पती ल्हाःचिं तयादिसें महानगरया प्रमुख प्रशासकीय अधिकृत पौड्यालं स्वयेबलय् चिधंगु व सामान्य जूसां अतिकं महत्वपूर्ण, नागरिकं न्यना व खनाच्वंगु सेवा कायेत थुकथंया सम्झौता यानागु व थुकिं नागरिकं प्रत्यक्ष लबः काये खनीगु विश्वास प्वंकादिल ।
नबिलया प्रमुख कार्यकारी अधिकृत शाहं थ्व सहर सकसिगुं खः धासें थुकिया संरक्षण व व्यवस्थापनय् सकलें जानाः ज्या यायेमाःगु खँ न्ह्यथनादिसें महानगरया नेतृत्वय् थःपिंत जिम्मेवारी बिल धाःसा दायित्व बहन यायेत तयार दु धयादिल ।
थ्व हे झ्वलय् थनया थँबहिलिइ च्वंगु छायाँ सेन्टरं नं सर्वसाधारणया निंतिं शौचालय उपलब्ध याकीगु जूगु दु । पर्यटकीय लागा थँबहीया सेन्टरं विदेशी पर्यटकलिसें सर्वसाधारणयात सहज जुइकथं निःशुल्क शौचालयया व्यवस्था याकेत्यंगु खः ।
येँ महानगरया निःशुल्क शौचालय अभियानय् ऐक्यवद्धता प्वंकेगु झ्वलय् सेन्टरं थःगु व्यापारिक भवन दुने च्वंगु १२ गू चःबि निःशुल्क रुपय् प्रयोग याके बीत्यंगु खः ।
LEAVE YOUR COMMENTS