नाल्भानीयात स्वदँत्या कैद सजाय
एजेन्सी – रुसया प्रतिपक्षी नेता व राष्ट्रपति भ्लादिमिर पुटिनया कट्टर आलोचक एलेक्सी नभाल्नीयात स्वदँत्याया जेल सजाय न्यंकूगु दु। मस्कोया छगू अदालतं नभाल्नीयात न्हापा जेल सजायया इलय् तयातःगु सर्त उल्लंघन याःगु धासें थ्व सजाय न्यंकूगु खः । नभाल्नीयात छुं न्हि न्ह्यः जर्मनीं मस्को लिहां वःगु इलय् विमानस्थलय् तुं च्वंगु खः । थ्वयां न्ह्यः वंगु अगस्त नभाल्नीयात विष बियाः स्यायेगु कुतः नं जूगु खः । विमान दुने हे विष आक्रमणय् लाःम्ह नभाल्नीयात उपचारया निंतिं जर्मनीइ यंकातःगु खः ।
मेखे नभाल्नीयात ज्वनेधुंकुसां निसें हे रुसन्यंकं थीथी शहरय् द्वलंद्वः मनूत सतकय् कुहां वयाः पुटिन विरुद्ध प्रदर्शन यानाच्वंगु दु। मेखे नभाल्नीं नं थःत न्यंकूगु जेल सजायप्रति कडा प्रतिक्रिया प्वंकुसें राष्ट्रपति पुटिनयात ‘विष नकीम्ह मनू’ धकाः टिप्पणी यानादीगु दु। नभाल्नीयात जेल सजाय न्यंकेवं वय्कःया समर्थकतय्सं तत्काल प्रदर्शनया आह्वान याःगु खः । थ्व आह्वान लिपा सुरक्षाकर्मीतय् तःधंगु उपस्थितिया दथुइ नं सलंसः मनूत सतकय् मुंवःगु खः । थ्व प्रदर्शनया झ्वलय् मस्कों जक च्यासलं मल्याक प्रदर्शनकारीतय्त ज्वंगु समाचार वःगु दु। नभाल्नीया वकिलं अदालतया थ्व निर्णयविरुद्ध पुनरावेदन यायेगु खँ धाःगु दु। मेखे नभाल्नीयात जेल सजाय न्यंकेवं अन्तर्राष्ट्रिय समुदायं नं कडा प्रतिक्रिया बियाहःगु दु। युरापेली महादेशय् मानवअधिकारी सम्बन्धी ज्या याइगु काउन्सिल अफ युरोपं अदालतं न्यंकूगु फैसलां विश्वसनीतायात उपेक्षा याःगु धकाः धाःगु दु ।
अथेहे बेलायतया विदेशमन्त्री डोमिनिक राबं थ्व फैसलायात कमजोरीयुक्त धकाः धाःगु दु। अथेहे जर्मनीया विदेशमन्त्री हाइको मासं थ्व फैसलां दृढ रुपं स्थापित नागरिक स्वतन्त्रता व कानुनी शासनय् धक्का लाःगु खँ धयादीगु दु। अमेरिकी विदेशमन्त्री एन्टोनी ब्लिंकेनं नभाल्नीयात बिनाशर्त त्वःतेमाःगु माग यासें थः नागरिकतय् अधिकार कायम यानातयते असफल जूगु रुसयात जवाफदेही दयेकेगु निंतिं थः साझेदारतलिसे जानाः ज्या यायेगु खँ नं धयादीगु दु ।
मेखे रुसया विदेशमन्त्रालयया प्रवक्ता मारिया जाखारोभां धाःसा अन्तर्राष्ट्रिय समदाुया प्रतिक्रियायात लिसः बीगु झ्वलय् थःथःगु देय्या समस्याय् जक केन्द्रीत जुइत धयादीगु दु। वय्कलं सार्वभौम देय्या आन्तरिक मामिलाय् हस्ताक्षेप मयायेत नं पश्चिमा देय् यात धयादीगु दु ।
LEAVE YOUR COMMENTS