लानिपुखू सेनायात बीगु खँय् पुरातत्व विभागया समर्थन, सम्पदाप्रेमीतय् विरोध

येँ – राजधानी येँेदेय्या दथुइ लाःगु लानिपुखू पुन–र्निर्माणया जिम्मा नेपाली सेनायात बीगु खँ सार्वजनिक जुइवं उकियात कयाः थीथी कथंया प्रतिक्रिया पिहां वःगु दु ।

लानिपुखू निर्माणया ज्या सेनायात बीगु खँयात सम्पदाप्रेमितय्सं विरोध याना हःगु दु । सेनाया ज्या राष्ट्रिय सुरक्षालिसे जक स्वाइगु जूगुलिं सम्पदा निर्माण थेंज्याःगु संवेदनशील ज्याय् सेना प्रयोग मयाःसां जिउ धइगु सः उमिसं तया हःगु दु ।

उखे पुरातत्व विभागं धाःसा सेनायात जिम्मा बिउसां नं लानिपुखूया निर्माण बांलाक याये फइगु विश्वास प्वंकूगु दु । पुरातत्व विभागया महानिर्देशक भेषनारायण दाहालं नेपाल सरकारं जिम्मा बीगु न्ह्यागु नं ज्या

सेनां यायेफु धइगु नजिर स्थापित जुइधुंकूगु खँ कनादिल । वय्कलं लानिपुखूया जिम्मा नं सेनायात बियां छुं मस्यंगु खँ कनादीगु दु ।
लानिपुखू पुनर्निर्माण यायेबलय् पूरा यायेमाःगु सकतां मापदण्ड सेनां पूवंके फइगु बचं वःगु खँ कँसें महानिर्देशक दाहालं उकिया नक्सा व सकतां ड्रइंग तयार जुइधुंकूगु व वहे अनुसार सेनां ज्या याइगु जूगुलिं समस्या मवइगु खँ नं वय्कलं कनादिल ।

येँ महानगरपालिकाया मेयर विद्यासुन्दर शाक्यं धाःसा थुकियात कयाः अनौपचारिक सहलह जूगु खँ ‘नेपालभाषा टाइम्स’ यात कनादिल । थुकिया बारे सेना लिसें पुरातत्व विभाग, सम्पदाप्रेमि, उपभोक्ता समितिलिसे नं सहलह जूगु खँ नं वय्कलं कनादिल ।

लानिपुखू दयेकेगु ज्या सेनायात याके बीगु लाकि मेगु हे छुं निकाययात याके बीगु विकल्पया बारे सहलह जुयाच्वंगु खँ नं वय्कलं कनादिल ।
मेखे उपमेयर हरिप्रभा खड्गी श्रेष्ठं धाःसा लानिपुखू दयेकेगु ज्या सेनायात मबिसे स्वनिगःया स्थानीय नेवाःतय्त बीमाःगु बिचाः ‘नेपालभाषा टाइम्स’ यात कनादिल ।