‘त्रिभाषिक मखु बहुभाषिक नीति माः’

येँ – भाषाविद् अमृत योन्जन तामाङं वर्तमान नेपाःयात आवश्यक जूगु भाषा नीति धइगु बहुभाषिक खः, त्रिभाषिक मखु धयादीगु दु । नेपाःया संविधानय् बहुभाषिक नीति लागू जुइ धकाः च्वयातःगु दुसां पाठ्यक्रम विकास केन्द्र्रं त्रिभाषिक नीति कथं पाठ्यसफू दयेकाच्वंगुलिं थ्व संविधानया उल्लंघन खः धयादीगु दु ।

त्रिभाषिक नीति जुल धाःसा खस नेपाली मांभाय् जूपिंसं निता जक भाय् स्यंसा गाइ, मेगु भाय् ल्हाइपिंसं स्वता भाय् स्यने मालीगु खँ नं वय्कलं कनादिल । ११ क्वःगु गणतन्त्र दिवसया लसताय् गोरखापत्र नयाँ नेपाल पृष्ठया ग्वसालय् म्हिगः जूगु भाषिक अन्तक्र्रिया ज्याझ्वलय् थःगु ज्यापौ न्ह्यब्वसें वय्कलं थ्व खँ कनादीगु खः ।

ज्याझ्वःया मूपाहां भाषा आयोगया अध्यक्ष लवदेव अवस्थीं भाषा आयोगयात पूर्णता बियाः ज्या याकल धाःसा सरकारयात भाषा नीति बारे सुझाव बी फइगु खँ कनादिल । नयाँ नेपाल पृष्ठ समितिया नायः अब्दुल सलामया सभापतित्वय् जूगु उगु ज्याझ्वलय् गोरखापत्र संस्थानया महाप्रवन्धक बसन्तप्रकाश उपाध्याय आदिपिंसं नं न्ववानादीगु खः ।