‘कोशी’ नां लित कायेत पहल याइगु

येँ (नेपालभाषा टाइम्स)- कोशी प्रदेश नां तयेगु खँय् पार्टीपाखें जूगु गल्तीयात कयाः वक्तव्य हे पिकयाः सुधार यायेत नेकपा माओवादी केन्द्र तयार जूगु दु । म्हीग माओवादीया केन्द्रीय दुजः लिसें थीथी जनवर्गीय संगठनया पदाधिकारीतय्सं पार्टी अध्यक्ष पुष्पकमल दाहालयात नापलानाः थ्व विषयय् सहलह याःगु खःसा उगु इलय् अध्यक्ष दाहालं वक्तव्य हे पिकयाः गल्ती स्वीकार यायेगु व वयां लिपा ‘कोशी’ नां लित कायेत पहल यायेगु खँ धयादीगु खः।

वय्कःयात नापलायेत वंपिं मध्ये छम्ह केन्द्रीय दुजः सुरेश आले मगरं नेपालभाषा टाइम्स यात कनादी कथं उगु आन्दोलनय् लानाः मदुम्ह लाजेहाङ लिम्बुयात शहीद घोषणा यायेत नं अध्यक्ष दाहाल तयार जुयादीगु दु । थ्व स्वयां न्ह्यः सरकारं लिम्बुया छेँजःयात स्वंगू लाख तका दां बीगु निर्णय याःगु खः । लिम्बुयात शहीद घोषणा यायेत याकनं हे माःगु पहल न्ह्याकेगु बचं नं दाहालं बियादीगु खँ धाःगु दु ।

अध्यक्ष दाहालं पहिचानया मुद्दा माओवादीं हे ल्ह्वंगु व आः तक नं थ्व मुद्दायात त्वःतागु मदुनि धासें आः नं थुकियात न्ह्यःने न्ह्याकेगु खँ कनादीगु खः । कोशी प्रदेशया पक्षय् मत बीगु पार्टी केन्द्रया निर्णय मखुसां वंगु फागुनय् जूगु मतदानय् पार्टीया सांसदतय्सं कोशीया पक्षय् मत बिउगुलिं छुं द्वंविद्वं जूवंगु खँ नं वय्कलं स्वीकार यानादिल ।
प्रम दाहालयात म्हिगः नं छपुचः जनजाति नेतातय्सं नापलासें थ्व विषययात गम्भीर रुपं कायेत इनाप याःगु खः ।