पालंपाः नायः जुइगु सहमति

वल्र्ड नेवाः अर्गनाइजेशनय् चुनाव याये म्वायेक सम्झौता

येँ – थ्वहे वालय् येँय् जुइत्यंगु वल्र्ड नेवाः अर्गनाइजेशनय् नायः जुइत उम्मेदवारी बियादीपिं निम्हं प्रत्याशीतय्सं आः वइगु कार्यकाल पालंपाः नायः जुइगु सहमति यासें चुनावया सम्भावना मदयेका छ्वःगु दु । वर्तमान नायः सिजन श्रेष्ठ व वरिष्ठ न्वकु दया शाक्यया दथुइ प्रतिस्पर्धा जुइगु जुइवं न्हूम्ह नायः ल्ययेत चुनाव हे याये मालीगु अवस्था पिहां वयेत्यंगु खः ।

तर डब्लुएनओ छगू अन्तर्राष्ट्रिय संस्था जूगु कारणं चुनाव यायेगु ज्या प्राविधिक कारणं समेत तसकं झंझट जुइगु चुनावं न्हूगु नेतृत्व ल्ययेगु ज्या जुल धाःसा थुकिं संस्था दुने मतमुताव समेत ब्वलनीगु सम्भावना अप्वः दगुलिं सर्वसम्मत नायः ल्ययेगु कुतः जूगु खः । थ्व झ्वलय् म्हिगः जूगु सहलहं निम्हं प्रत्याशीपिं नायः सिजन श्रेष्ठ व न्वकु दया शाक्यं आः वइगु स्वदँया कार्यकाल दत्या–दत्या नायः जुयाः त्वःतेगु सहमति कायम जूगु खः ।

थुकी न्हापांगु दत्या वर्तमान नायः सिजन श्रेष्ठ हे नायः जुयादीसा वयां लिपाया दत्या वरिष्ठ न्वकु दया शाक्य नायः जुयादी । स्वदँ न्ह्यः अमेरिकाया बाल्टिमोरय् जूगु डब्लुएनओया निक्वःगु तःमुँज्याय् सिजन श्रेष्ठ नायः जुइगु व स्वक्वःगु तःमुँज्यां वरिष्ठ न्वकु दया शाक्ययात नायः ल्ययेगु मौखिक समझदारी जूगु दावी न्वकु शाक्यं यानादीगु खः ।

उकिया लिसलय् नायः श्रेष्ठं थःपिनि विधानय् निक्वः तक अध्यक्ष जुइ दइगु प्रावधान दुगु जुयाः थः हानं छक्वः अध्यक्ष जुइत न्ह्ययचिनागु दावी यानादीगु खः । निम्हेस्यां नं त्वःतीगु सम्भावना मदयेवं चुनाव लिछ्यायेगु तक खँ पिदनेधुंकूगु खः ।थ्वहे झ्वलय् डब्लुएनओया विधानया छगू धारा नं विवादय् लाःगु दु ।

विधानया धारा ४.२ लय् संस्थाया नायः लगायत फुक्क हे पदाधिकारीत निक्वः स्वयां अप्वः केन्द्रीय ज्यासना पुचलय् च्वने दइ मखु धकाः उल्लेख यानातःगु दु । थुकिया अर्थ केन्द्रय् च्वनेधुंकूम्ह दुजः तकं निक्वः स्वयां अप्वः केन्द्रय् च्वने मदइगु जूगुलिं थुकिं यानाः लिपा संस्थायात आवश्यक जूपिं मनू मालेत हे थाकुइगु खँ धाःगु दु । थ्वहे वइगु विहीवाः डब्लुएनओया स्वक्वःगु तःमुँज्या वाङ्मय शताब्दी पुरुष सत्यमोहन जोशीं उकिया उलेज्या यानादी ।