नेपाःया न्यागू क्षेत्रय् चीनया प्राथमिकता

येँ – नेपालं चीनलिसे यातायात सञ्जाल, अन्तरदेशीय विद्युत प्रसारण लाइन, कृषिया आधुनिकीकरण, पर्यटन प्रवद्र्धन व जनस्तरया सम्बन्ध विकासयात उच्च प्राथमिकताय् तःगु दु । चीनया औपचारिक भ्रमण पूवंकाः म्हिगः नेपाः लिहां झाःम्ह परराष्ट्रमन्त्री प्रदीपकुमार ज्ञवालीं त्रिभुवन अन्तर्राष्ट्रिय विमानस्थलय् सञ्चारकर्मीलिसे खँ ल्हायेगु झ्वलय् ‘छगू क्षेत्र छपु मार्ग’ (बिआरआई) अन्तर्गत ग्वाहालि यायेगु निंतिं नेपालं निर्धारण याःगु प्राथमिकताया उगु न्यागू क्षेत्र बारे विस्तृत रुपं चिनियाँ पक्षयात धयागु खँ वय्कलं कनादिल ।

चिनियाँ अधिकारीपिंसं नेपालय् छुं लगानी जुयाच्वंगु व थप लगानीया निंतिं प्रक्रियागत झन्झट अन्त्य यानाः अःपुगु लकस दयेकेत इनाप याःगु जानकारी बियादिसें वय्कलं थप पुँजी व उत्कृष्ट प्रविधि नेपालय् हयेत व न्ह्याकेधुंकूगु परियोजना इलय् हे क्वचायेकेत इनाप यानागु खँ कनादिल ।

सिचुवान प्रान्तया गभर्नरलिसे नापलायेगु झ्वलय् चीनलिसे नेपाःया अप्वया वनाच्वंगु व्यापार घाटा म्हो यायेत सिचुवान प्रान्तय् नेपाः पाखें निर्यात योग्य वस्तुया सहज प्रवेशया निंतिं इनाप यायेगुया लिसें नेपाल व सिचुवान प्रान्त दथुइ राजनीतिक, आर्थिक, सामाजिक साँस्कृतिक व जनस्तरया सम्बन्ध अप्वया वनाच्वंगु व सिचुवान प्रान्तया आर्थिक सामथ्र्यं नेपालं पर्याप्त लाभ कायेफइगु सम्भावनायात ध्यानय् तयाः उगु प्रान्तया छन्दुइ नेपाल सरकारं वाणिज्य दूतावास स्थापना याये चाहे जूगुलिं उकी ग्वाहालि यायेत इनाप यानागु जानकारी नं वय्कलं बियादिल ।

चीन सरकारया ग्वाहालिइ न्ह्यानाच्वंगु परियोजनाया प्रभावकारी कार्यान्वयनयात सहजीकरण यायेत निगू पक्षीय समन्वय व कार्यान्वयन संयन्त्र स्थापना यायेमाःगु, केरुङं येँ, येँपाखे पोखरा जुयाः लुम्बिनी स्वाइगु सीमा व्यापार रेलमार्गया सम्भाव्यता अध्ययन यायेगु व विस्तृत परियोजना प्रतिवेदन तयारी बारे सहलह जूगु खँ नं वय्कलं कनादीगु दु ।

थः समकक्षीलिसे जूगु वार्ताय् सीमा नाकाया सञ्चालन व स्तरोन्नति, निगू पक्षीय रसुवा–केरुङ व तातोपानी–झाङमु नाकाया स्तरोन्नति यायेगु व तातोपानी नाकायात याकनं चायेकेत इनाप यानागु खँ नं वय्कलं कनादिल ।

निगू पक्षीय व्यापार नेपाःया चीनलिसेया अप्वया वनाच्वंगु व्यापार घाटा म्हो यायेत चीनय् नेपाःया निर्यात अप्वयेकेत माःगु खँय् बः बियागु खँ नं वय्कलं कनादिल । लिसें वय्कलं चीनया विदेशमन्त्री वाङं नेपाःया उत्पादनयात चीनय् बांलाःगु बजाःया पहुँच थ्यंकेगु सुविधा बीगु आश्वासन बिसें चीनया खुलापन व सुधारं ब्वलंगु ह्वःतापाखे फाइदा कायेत इनाप यानादीगु खँ नं कनादीगु दु ।