शिकागोय् न्हूदँया ज्याझ्वः व झ्वःभ्वय्

येँ – नेवाः अमेरिकन दबू शिकगोया ग्वसालय् नेपाल संवत् ११४० न्हूदँया लसताय् छगू तःजिगु ज्याझ्वः यासें न्हूदँ हनेगु ज्या जुल । नच्चापिं मस्तय्सं धिमे थानाः लसकुस यासे न्ह्याःगु न्हूदँया ज्याझ्वलय् नेपालं झायादीम्ह जिथिम्ह मय्जु रत्नदेवी तुलाधरं त्वाःदेवाय् मत च्याकाः ज्याझ्वःया उलेज्या यानादीगु खः ।

ज्याझ्वलय् दबूपाखें पिथना वयाच्वंगु ‘शिकागो नेवाः’ गुंगूगु ल्याःया पितब्वज्या नेपाःया कन्सुलेट जनरल मार्मिन ब्रस्टीन व वय्कःया तिरिमय्जुं मंकाःकथं यानादीगु खः । उगु दँपौया सम्पदान दबूया पुलांम्ह नायः केशरमान ताम्राकारं यानादीगु खःसा कन्सुलर ब्रस्टीनं नुगःखँ नं प्वंकादीगु खः ।

दबूया नायः किरण ब्यञ्जनकारं लसकुस यानादीगु ज्याझ्वलय् दबूया पुलांगु ज्यासना पुचःया पदाधिकारीपिंत सुभाय् देछासे न्हूगु ज्यासना पुचःयात निवर्तमान नायः उदय महर्जनं लसकुस यानादीगु खः । सत्यां मल्याक मनूतय् सहभागिता दुगु ज्याझ्वलय् म्येँ, हुलाप्याखं नं न्ह्यब्वःगु खःसा सहभागि सकसितं नेवाः झ्वःभ्वय् नकेगु ज्यानं जूगु खः ।