हानं लगानी सम्मेलनया तयारी

येँ – सरकारं २०७३ साल फागुन १९ व २० गते नेपालय् लगानी सम्मेलन याःगु खःसा उगु इलय् १४ खर्ब तका लगानी यायेगु प्रतिवद्धता वःगु खः । तर निदँ दयेधुंकाः नं प्रतिवद्धता प्वंकू कथंया लगानी धाःसा मवःनिगु खँ सीदुगु दु । सरकार हिलाच्वनी, फलोअप मजूगु, नीतिगत सुधार आदि कारणं विदेशीतय्सं नेपालय् लगानी यायेत स्वःसां नं कार्यान्वयन मजूगु खँ धाःगु दु ।

थ्वहे झ्वलय् सरकारं हाकनं वइगु चैत १५ व १६ गते लगानी सम्मेलन यायेगु तयारी यानाच्वंगु खँ सीदुगु दु । सरकारं विकासया गति अप्वयेकेमाःगु धासें लगानी सम्मेलन यायेत्यंगु खः । निदँ न्ह्यः जूगु सम्मेलनय् दकलय् अप्वः चिनियाँतय्सं लगानी यायेगु प्रतिवद्धता प्वंकूगु खः । उगु इलय् चिनियाँतय्सं ८ खर्ब ३० अर्ब तका लगानी यायेगु प्रतिवद्धता प्वंकूगु खः ।

तर चिनियाँ नागरिकपाखें नेपालय् लगानी यायेगु अप्वया वनाच्वंसां नं प्रतिवद्धता प्वंकू थें लगानी धाःसा दुहां मवः । अथेहे उगु इलय् बंगलादेशं ब्वति काःपिंसं २ खर्ब स्वयां अप्वः लगानी यायेगु विश्वास बिउगु खःसा भारतीय लगानीकर्तातय्सं ३१ अर्ब ७० करोड लगानी यायेगु खँ धाःगु खः । तर निगुलिं देशं प्रतिवद्धता प्वंकू कथं लगानी धाःसा दुहां मवः ।

अथेहे जापान व बेलायतं ब्वति काःपिंसं १÷१ खर्ब लगानी यायेगु धाःसां लगानी धाःसा म्हो जक दुहां वःगु खँ सीदुगु दु । तत्कालीन इलय् जूगु सम्मेलनय् छगू दर्जन स्वयां अप्वः देय्या निसःत्या संस्थागत व व्यक्तिगत लगानीकर्तां ब्वति काःगु खः । सम्मेलनय् ऊर्जा, पूर्वाधार, पर्यटन, सूचना प्रविधि, वित्तीय क्षेत्र, खानी तथा खनिज, कृषि व वनजन्य उत्पादन क्षेत्रलिसे सम्बन्धित थीथी विषयसं बिस्कं बिस्कं कार्यपत्र न्ह्यब्वःगु खः ।