अन्तर माविस्तरीय वादविवाद कासा

ख्वप – सार्वजनिक मावि संयुक्त परीक्षा समितिया ग्वसालय् अन्तर माध्यमिक विद्यालयस्तरय् वादविवाद कासा जुल । समितिया दछियंकंया कार्यतालिकाकथं जूगु उगु कासा देवी माध्यमिक विद्यालय सौडोलया ग्वसालय् जूगु खः । कासाय् मिसा विद्यार्थीया निंतिं ‘धन स्वयां मन तःधं’ व मिजं विद्यार्थीया निंतिं ‘फेसबुक उपयुक्त मखु’ धइगु विषय बियातःगु खः ।

उगु वादविवाद कासाय् मिजंपाखे उज्ज्वल सुवेदी (बागीश्वरी मा.वि) न्हाप, राम दुलाल (पंचकन्या मा.वि.) लिउ व नन्दराम दाहाल (चाँगुनारायण मा.वि.) लियांलिउ लाःगु खःसा मिसापाखे करुणा तिमिल्सिना (पंचकन्या मावि), सुष्मा खत्री (जोरपाटी मावि) व सन्ध्या ढुंगेल (चाँगरनारायण मावि) छसिकथं न्हाप, लिउ व लियांलिउ लाःगु खः ।

कासाय् विजयी विद्यार्थीतय्त समितिया नायः कृष्णप्रसाद धन्छां सिरपाः लःल्हासें थज्याःगु अतिरिक्त क्रियाकलापं विद्यार्थीतय्त पाठ््यपुस्तकय् जक सीमित मयासे व्यवहारिक रुपं जीवनोपयोगी जुइगुपाखे नं यकीगु विचाः तयादिल ।

गणेश मावि छालिङया प्रधानाध्यापक इन्द्रबहादुर फोंजुं फेसबुकया महत्वयात कयाः उकिया प्रयोग यायेबलय् सचेत जुइ मफुत धाःसा दुरुपयोग जुइ फइगु विचाः तयादीगु खः । ज्याझ्वलय् तारा माविया प्रधानाध्यापक रामगोपाल त्वाय्नानं थःगु नुगःखँ तयादीगु खः ।

देवी माविया प्रधानाध्यापक राजाराम छुंकाया सभापतित्वय् जूगु कासाय् गुंगू व झिगू तगिंया विद्यार्थीतय्सं ब्वति काःगु खः ।