लुम्बिनीइ पोखरेल सरकारया आयु कन्हय् तक

येँ -लुम्बिनी प्रदेशय् मुख्यमन्त्री शंकर पोखरेलया सरकार विरुद्ध कन्हय् विपक्षी पार्टीतय्सं दर्ता याःगु अविश्वास प्रस्ताव बारे छलफल याइगु जूगु दु । थःगु सरकार बचे यायेत मुख्यमन्त्री पोखरेलं जसपाया स्वम्ह सांसदया पद कायम यायेमाः धकाः सर्वोच्च अदालतय् तःगु रिट खारेज जूगु दु । थुकिं यानाः वय्कः स्पष्ट रुपं अल्पमतय् लाःगु दु ।

अथे हे प्रदेश प्रमुख अमिक शेरचनं थौं सःतूगु संसद अधिवेशन स्थगित यायेमाः धकाः तःगु छगू रिट दर्ता हे मजुसे लिहां वःगु दु । थुकिं यानाः मुख्यमन्त्री पोखरेलया पद बचे यायेत जूगु फुक्क हे कुतः विफल जूगु दु ।

वय्कःयात चीकाः आः माओवादी केन्द्र व नेपाली कांग्रेस जानाः सरकार गठन यायेगु सहमति जूगु दु । अन आः ल्यं दनिगु १६ महिनाया कार्यकालय् माओवादीं च्याला व कांग्रेसं च्याला पालंपाः मुख्यमन्त्री चले यायेगु धकाः म्हिगः सहमति जूगु दु । थुकी न्हापांगु च्याला माओवादीया कुलप्रसाद केसी व लिपांगु च्याला कांग्रेसया वीरेन्द्र कनौडिया मुख्यमन्त्री जुइगु खँ धाःगु दु।