येँया थीथी थासय् सांस्कृतिक केन्द्र दयेकीगु

येँ (नेपालभाषा टाइम्स)- विश्व सम्पदाया धलखय् सूचीकृत क्षेत्रयात सांस्कृतिक केन्द्रया रुपय् विकास याइगु जूगु खः । विश्व सम्पदा धलखय् सूचीकृत बसन्तपुर दरबार क्षेत्र व स्वयम्भू महाचैत्य, जीवित देवी श्री कुमारी च्वनीगु कुमारी छेँ, लाखेछेँ, पवित्र भूमि सीतापाइला, तलेजु देगः थेंज्याःगु सम्पदा व यँयाः थेंज्याःगु जात्रापर्वय् प्रचलित क्षेत्रयात सांस्कृतिक केन्द्रया रुपय् विकास याना यंकेगु सोच न्ह्यःने हःगु खः ।

थुकिया प्रत्यक्ष लाभ स्थानीय बासिन्दां काये खनीकथं व्यवस्था व्यवस्था यायेत्यनागु खँ संस्कृति, पर्यटन तथा नागरिक उड्डनमन्त्री जीवनराम श्रेष्ठं कनादीगु दु । सम्पदा क्षेत्रया जनतां पर्यटनपाखें प्रत्यक्ष लबः काये खनीगु वातावरण दयेकीगु खँ नं वय्कलं कनादिल ।

पर्यटन क्षेत्रया विकासया लागिं सरकारं पर्यटन दशकया अवधारणा न्ह्यःने हःगु खँ न्ह्यथँसें वय्कलं पर्यटन हे नेपाःया आर्थिक विकासया आधार जूगु व कोभिड– १९ लिपा लिउने लाःगु पर्यटनयात पुनरुत्थान यायेत थःपिंसं ‘पर्यटन दशक २०२३–२०३३’ या अवधारणा न्ह्यःने हयागु खँ नं कनादीगु दु ।

येँया छाउनीस्थित बाहिति सङ्गमटोल सुधार समितिं म्हिगः याःगु न्हूदँया भिंतुना कालबिल ज्याझ्वलय् न्ववासें वय्कलं उगु खँ धयादीगु खः । वय्कलं येँया निर्वाचन क्षेत्र नं. ८ य् पूर्वाधार विकासपाखे थःपिंसं यानागु ज्याखँया बारे नं चर्चा यानादीगु खः । स्वयम्भू महाचैत्य समेत लाःगु थ्व क्षेत्रयात पर्यटन विकासया केन्द्र दयेकेगु बचं नं वय्कलं बियादिल ।

वय्कलं थ्वहे क्षेत्रय् लाःगु बसन्तपुरंनिसें स्वयम्भू तक व अनं नं च्वय् ह्वाइट गुम्बा तक हे पर्यटकीय क्षेत्रया रुपय् विकास याना यंकेगु योजना नं न्ह्यःने तयादिल ।