टेकु अस्पतालय् नं ध्यबा कायेगु सुरु

येँ (नेपालभाषा टाइम्स) – सरकारं कोरोना संक्रमिततय् उपचार खर्च संक्रमितं हे पुलेमाःगु निर्णय यायेधुंकाः आः टेकु अस्पतालं नं ध्यबा कायेगु सुरु याःगु दु। टेकुया शुक्रराज ट्रपिकल तथा सरुवा रोग अस्पतालं सरकारं कोरोना संक्रमिततय् उपचारया निंतिं ध्यबा बीगु बन्द यायेवं विरामीपाखें हे ध्यबा कायेमाःगु खँ धाःगु दु । अस्पतालं म्हिगः कोरोना उपचारया निंतिं शुल्क तोके याःगु खः । आः तोके याःगु शुल्क कथं भेन्टिलेटर सहित आइसियुलय् तयेमाःम्ह विरामी जूसा न्हिं १५ हजार व धरौटी ५० हजार, भेन्टिलेटरय् जक तयेमाःसा न्हिं ७ हजार ५००, क्याबिन आइसलेसेनय् च्वनेगु खःसा न्हिं ७ हजार ५०० व मध्यम जटिलता दुपिं ग्यास्ट्रो वार्डय् च्वनीगु खःसा न्हि ३ हजार ५०० काइगु जूगु दु ।

अस्पतालया निर्देशक डा. सागरराज भण्डारीं सरकारं उपचार खर्च मबिउगुलिं संस्था चले यायेत हे संक्रमिततय्पाखें शुल्क तोके यायेमाःगु खँ धयादीगु दु । ‘न्हापा सरकारं हे खर्च बिया वयाच्वंगु खःसा जिमिसं निःशुल्क उपचार याना वयाच्वनागु खः । आः सुनां नं उपचार खर्च मबीगु जुइवं संस्था चले यायेगु निंतिं उपचार खर्च कायेगु क्वःछीमाल’ वय्कलं धयादीगु दु ।

सरकारं मोहनि न्ह्यव हे विपन्न, अशक्त, असहाय, असहाय एकल महिला, अति अपाबता, ज्येष्ठ नागरिक, अग्रपंक्तिइ खटे जुइपिं स्वास्थ्यकर्मी, सरसफाइ कर्मचारी, सुरक्षाकर्मीलिसें जोखिम क्षेत्रय् ज्या यानाच्वंपिं कर्मचारीतय् जक निःशुल्क परीक्षण व उपचार खर्च व्यहोरे यायेगु क्वःछीधुंकूगु खः ।

थ्वहे दथुइ सरकारं सरकारी अस्पतालतय्त कोरोना उपचारया धरौटी मकायेत निर्देशन बिउगु दु ।

सम्बन्धित बुखँ

LEAVE YOUR COMMENTS