नगदेशय् धर्मचक्र प्रवर्तन दिवसनापं अधिवेशन

थिमि – नगदेश बौद्ध समूहया ग्वसालय् २६०८ क्वःगु धर्मचक्र प्रवर्तन दिवस तःजिक बुद्धपुजा यासें हन । असार पुन्हि (गुरुपुन्हि)या न्हिकुन्हु जूगु बुद्धपुजाय् थाइल्याण्डं नगदेश बुद्ध विहारय् वर्षावास च्वनेत बिज्याःम्ह भिक्षु खनो·पाखें अष्टशील व पंचशील ग्रहण यासें ज्याझ्वः न्ह्याकूगु खः ।

बुद्ध पुजा सिधःगु लगत्तै हे निगूगु चरणया ज्याझ्वःकथं नगदेश बौद्ध समूहया न्हय्क्वःगु अधिवेशन न्ह्याःगु खः । अधिवेशनया उलेज्या मध्यपुर थिमि नगरपालिकाया प्रमुख मदनसुन्दर श्रेष्ठं न्हय्प्वाःमत च्याकाः यानादीगु खः । मूपाहां नगरप्रमुख श्रेष्ठलिसें भिक्ष खनो· व अनागारिका केशावति गुरुमां नं मंकाःकथं नगदेश ज्ञानमाला भजन खलकं तयार याःगु भजन सफूया पितब्वज्या यानाबिज्यात ।

समूहया अध्यक्ष दीपकराज साँपालया सभाध्यक्षताय् समूहया कोषाध्यक्ष रत्नभक्त हाँय्जुं लसकुस यानादीगु ज्याझ्वलय् समूहया सचिव कृष्णकुमार प्रजापतिं प्रगति प्रतिवेदन न्ह्याब्वयादीगु खः । उगु इलय् मूपाहां नगरप्रमुख श्रेष्ठं समूहया न्हूगु ज्यासना पुचःयात अझ सक्रिय व समर्पित जुयाः न्ह्याः वने फयेमा धकाः भिंतुना देछासे कार्यकालया सफलताया नं कामना यानादिल ।

अधिवेशनया निगूगु चरणय् वरिष्ठ उपासक जगतबहादुर हाँयजुया अध्यक्षताय् न्ह्याःगु बन्द सत्रं समूहया न्हूगु ज्यासना पुचः नं गठन याःगु खः । सर्वसम्मतं दीपकराज साँपालया अध्यक्षताय् १९ म्हेसिया न्हूगु ज्यासना पुचः ल्यःगु खः । ज्याझ्वःया अन्त्यय् बुद्ध मूर्तियात खतय् तयाः सांस्कृतिक बाजंसहित नगदेश नगर परिक्रमा याःगु खः ।

सम्बन्धित बुखँ

LEAVE YOUR COMMENTS