फास्ट ट्राय्कया प्रस्थान विन्दूइ अझं विवाद

येँ – ट्राय्कया प्रस्थान विन्दू खोनां चीकाः बुंगय् यंकेगु तयारी सरकारं यायेवं खोनाया स्थानीयवासीं थ्व विन्दू हे मेथाय् यंके मजिउ धया हःगु दु । प्रस्थानविन्दू अनं चीकाः बुंगया फर्सिडोलय् यंकेगु प्रस्ताव वयेवं म्हीग रक्षामन्त्री ईश्वर पोखरेलया छगू पुचः निगुलिं थाय्या अध्ययन याः वंगु खः । उगु इलय् खोनाया स्थानीय मनूतय्सं प्रस्थान विन्दू खोनाय् तयेगु सवालय् वयाच्वंगु समस्या समाधान याना वनेमाः तर थाय् हे हिलेगु ज्या धाःसा याये मजिउ धकाः रक्षामन्त्रीयात इनाप याःगु दु ।

स्थानीय जनतापाखें अज्याःगु माग याना हःगुलिं नेपाली सेनापाखें नं ठोस निर्णय जुइधुंकाः जक मेगु पलाः न्ह्याकेगु खँ धाःगु दु ।

फास्ट ट्राय्क निर्माणया ज्या प्यदँ दुने सिधयेकेमाःगु जुयाः थःपिंत याकनं निर्णय माल धकाः सेनां नं दबाब बिया हःगुलिं रक्षा मन्त्री थः हे थाय्या निरीक्षण यायेत उखे वंगु खः ।

सूत्रतय्सं धाः कथं फास्ट ट्राय्कया प्रस्थान विन्दू खोनाय् तये मजिउ धकाः विशेष यानाः विप्लव माओवादीं जक विरोध यानाच्वंगु खः धासें अथे खःसां प्रस्थान विन्दू अनं चीके हे माः धइगु पक्षय् धाःसा सुं मदु धकाः नं आग्रह याःगु खः । थ्व बारे निर्णय यायेत सरकारं आः छन्हु निन्हु ई काइतिनिगु खँ धाःगु दु ।