विष्णुमति खुसि सिथय् इन्द्रायणी पार्क

येँ – येँ महानगरपालिकां विष्णुमति खुसि सिथय् इन्द्रायणी पार्क निर्माण याइगु जूगु दु । येँ महानगरं कालिमातिनिसें ल्हुतितक विष्णुमति खुसि सिथय् जग्गा संरक्षण, हरियाली विकास व उगु थासय् पार्क दयेकेगु योजनाकथं वंगु सोमवाः पार्कया शिलान्यास याःगु दु ।

येँ महानगरपालिका प्रमुख विद्यासुन्दर शाक्यं इन्द्रायणी गुरुयोजना अन्तर्गत पार्कया शिलान्यास यानादीगु खः । ज्याझ्वलय् नवासें येँ महानगर प्रमुख शाक्यं प्राचीन इतिहास कुबिया च्वंगु ये देसं अप्वया वनाच्वंगु सहरीकरण व विकास क्रमलिसें हरेक खण्ड स्यना वनाच्वंगु दु धयादिल ।

थःपिं निर्वाचित जुया वयागु इलंनिसें सहरया मौलिकता ल्यंकेत थाय्, ई व परिवेशया लिधंसाय् आधुनिकताया उपयोग यानाः सुधार यायेगु ल्याखं थःपिं प्रतिवद्ध जुयाः ज्या यानाच्वनागु धासें येँ महानगर प्रमुख शाक्यं धयादिल, ‘थ्व सहर इलय् व्यलय स्यना वनां च्वन । थुकिया अपजस सुयात बीगु ? बांलाःगु ज्या जूसा जिं यानागु धकाः दावी याइ ।’

‘ई परिवर्तनशील खः । थुकिया विकास व गतियात स्वीकार यायेमाः । गुगुं इलय् हवाइजहाज गयेबलय् द्यःयात हाचां गाइ धइगु मनोविज्ञान बुलुहुं नं आः वयाः मदया वंगु दु । थुकथं हे विकासया आयाम स्वीकार यायेमाः’ महानगर प्रमुख शाक्यं धयादिल ।

पुलांगु हे अवस्थाय्् च्वंच्वनेगु खः वा न्ह्याः वनेगु खः धइगु न्ह्यसःया लिसः आवश्यक जूगु खँ कुलादिसें वय्कलं लोकहित मजुइगु योजना खःसा थन कमजोरी जुल धकाः कुले फयेकेमाः । तर अज्याःगु अवस्थाया महसुस यायेमालाच्वंगु मदु धयादिल ।

येँ महानगर १७ वडाअध्यक्ष नविन मानन्धरं विष्णुमति खुसिइ न्हापा थें असला न्या दइकथं ज्या यायेगु जुइ धयादिल । वय्कलं धयादिल, ‘असला न्याया निंतिं शुद्ध लः माः । जिमिसं समुदाय व सरोकारवालालिसे जानाः विष्णुमति खुसियात असला न्या दइकथं खुसि व जल सम्पदाया समृद्धियात वडाया विम्बया विकास यायेगु जुइ ।’

पुलांम्ह मन्त्री सुशीलकुमार श्रेष्ठं खुसिबुँ टाउन प्लानिङ छगू शिक्षा जूगु धासें थुकियात खुसिया सभ्यतालिसे स्वायेत महानगरं न्ह्यःने हःगु योजनायात कयाः च्वछायादिल । २ रोपनी ८ आना ३ पैसा जग्गाय् दयेकेत्यंगु पार्कय् पहुँचयुुक्त चःबि, ल्वहंहिति, खुल्ला ब्यायामशाला, नापं ख्यः नं दइ । पार्कया निर्माणया निंतिं छगू करोड ८० गू लाख लागत अनुमान यानातःगु दुसा १ गू करोड २२ गू लाखय् निर्माण यायेगु सम्झौता जूगु खः । ज्याझ्वलय् कार्यपालिका, वडा सदस्य व स्थानीतय् उपस्थिति दुगु खः ।

सम्बन्धित बुखँ

LEAVE YOUR COMMENTS