वीरगञ्जय् २३ किलो लुँ ज्वन

येँ (नेपालभाषा टाइम्स) – नेपाल प्रहरीं वीरगञ्जय् थ्यंमथ्यं २३ किलों मल्याक लुँ ज्वंगु दु। वीरगञ्ज महानगरपालिका ६ वडाया कुम्हाल त्वालय् च्वंगु गणेश अपार्टमेन्टय् छापा मारे यानाः प्रहरीं थ्व लुँ ज्वंगु खः । प्रहरीं अवैधरुपं लुँ हयातःगु धासें थन निगरानी तया वयाच्वंगु खःसा म्हिगः छापा मारे याःगु खः । छापा मारे यायेत्यंगु इलय् अपार्टमेन्टया छेँ थुवाः वइ धकाः पियाच्वंगु खःसां छेँथुवाः मवःगुलिं स्थानीय मनूतय् रोहबरय्छा पा मारे याःगु खः । लुँ बरामद याःगु अपार्टमेन्ट भारतीय नागरिक अशोक सिन्हा नांया व्यापारीया जूगु खँ धाःगु दु । थनं १ किलोया बिस्कुट झिंस्वंकू, चिचिकूगु लुँया बिस्कुट ४६ कू (मुक्कं ८ किलो ५७६ ग्राम), चिकूगु बिस्कुट झिकू (१ किलो) व ६८१ ग्राम लुँया तिसा बरामद यानागु खँ प्रहरीं म्हिगः हे पत्रकार सम्मेलन यानाः जानकारी बिउगु खः । प्रहरीं आः थ्व लुँ गनं वःगु धयागु बारे अनुसन्धान न्ह्याकूगु दु ।