खुसिबालं सीपिं ४३ म्ह थ्यन

येँ – मदिक्क वयाच्वंगु वा‌ं वःगु खुसिबाः व चलखं यानाः ४३ म्ह मनू सीगु दुसा, २० घाःपाः जूगु दु । अथेहे  नीप्यम्ह बेपत्ता जुयाच्वंगु दु । स्वनिगःया भ्वँतय् चलखं छेँ चुइकाः स्थानीय अजिम्ह व छय्म्ह सीगु दु । सीपिं मध्ये यलय् व भोजपुरय् न्याम्ह न्याम्ह लाःगु दुसा येँ, खोटाङ्ग, ओखलढुंगा, काभ्रेय् स्वम्ह स्वम्ह सीगु दु । धादिङ, झापा व सिन्धुलीइ निम्ह निम्ह सीगु दुसा पाल्पा, पर्सा, रामेछाप, इलाम, सुनसरी, बारा, रौतहट, सिराहा, धनुषा, चितवन व डोल्पाय् छम्ह छम्ह सीगु खः । सीपिं मध्ये झिंच्याम्ह मिस्त व नीन्याम्ह मिजंत लाःगु दु । खुसिबाः व चलखय् लाःपिं येँय् ४२ म्ह, यलय् स्वम्ह, ख्वप व मकवानपुरय् छम्ह छम्ह उद्धार याःगु दु । देय्न्यंकं यानाः आःतक ११०४ म्हेसित उद्धार यायेधुंकूगु खँ गृह मन्त्रालयं धाःगु दु ।

येँया बल्खु, बिष्णुमति, करः खुसि, डांगा खुसी, मनमति आदि खुसिइ तच्वकं बाः वयाः खुसि सिथय् च्वंगु आपालं छेँया छतँ धयाथें डुबे जूगु खः । उकथं हे ख्वपया हनुमन्ते खुसि बाः वयाः अन नं आपालं छेँ डुबानय् लाःगु दुसा खुसिबालं प्रभावित जूपिं स्थानीय जनतायात उद्धार यानाः सुरक्षित थासय् यंकूगु दु ।

खुसिबाः वयाः आपतय् लाःपिंत प्रहरी, सेना व सशस्त्र प्रहरीया पुचलं उद्धार याःगु खः । बल्खुइ चुइका हःगु ग्याँस सिलिन्डर लायेत वंम्ह स्थानीय विनोद चौधरी बेपत्ता जूगु दु । वंगु विहीवाः बहनीनिसें वा वःगु खःसा थौं नं देय्न्यंकं वा वये फइगु खँ मौसम पूर्वानुमान महाशाखां धाःगु दु । महाशाखां खुसि सिथय् तच्वकं बाः वयेफइगु खँ धासें सतर्क जुइत नं सर्वसाधारणयात इनाप याःगु दु ।

वां यानाः यलय् जक खुम्ह मनू सीगु दु । छेँ दुनाः, चलः वनाः व खुसिं चुइकाः खुम्ह सीगु खः । सीपिं बागमति गाउँपालिका माल्टाया झिंस्वदँ दुम्ह सरोज जिम्मा शुक्रवाः छेँय् दुनाः सीगु खःसा सीता राना चलखं ल्हानाः सीगु खः । अथे हे महांकाल गाउँपालिकाया अबिर गोले खुसि चुइकाः सीगु खःसा उगु हे ४५ दँ दुम्ह मनमाया लो व वया झिदँ दुम्ह काय सञ्जीव लो चलखं ल्हानाः सीगु दु । कुसुन्ती ४९ दँया सुवेश बस्नेत चुलुयाः खुसि लानाः सीगु खःसा वया सीम्ह नख्खुइ लुइकूगु खः ।

थ्वहे झ्वलय् खुसिबालं पीडित जूपिंत राहत इनेगु निर्णय सरकारं याःगु दु । शनिवाः गृहमन्त्री रामबहादुर थापाया अध्यक्षताय् च्वंगु केन्द्रीय विपद् व्यवस्थापन कार्यसमितिया बैठकं प्रदेश सरकारलिसे समन्वय यानाः जिल्ला विपद् व्यवस्थापन समितिपाखें स्थानीय तह मार्फत राहत वितरण यायेगु निर्णय याःगु खः । बैठकं राहत वितरण व्यवस्थित व प्रभावकारी यायेत संघीय सरकारया ग्वाहालिइ प्रदेश सरकारया समन्वय जुइ कथं स्थानीय सरकारपाखें राहत इनेगु निर्णय याःगु खः । येँया खुसिबाः पीडितयात नेपाल रेडक्रसपाखें राहत इनेगु शुरु याःगु दु ।

नेपालभाषा टाइम्स

च्वमिया मेमेगु

• मल्लया ‘सेप्टेम्बर १७’ अंग्रेजी भासं पिहां वइगु
• ख्वनाय् मुआब्जा कायेत सुचं वयेवं विरोध
• आवासीय बहाल कर ५ प्रतिशत जक
• बुँख्याः भूत
• कन्हसंनिसें त्वाः त्वालय् संकिपा महोत्सव