कलाकार जक मखु स्वतन्त्र

स्वतन्त्र संसार महर्जन छम्ह लोकंह्वाःम्ह नेवाः कलाकःमि खः । वया अबुया नां तेजकुमार महर्जन अले मांया नां कान्छिमाया महर्जन खः । स्वतन्त्र पेजथ्री नेपालभाषा पिपुल्स च्वइस अवार्ड ११३३ “इहिपा” पाखें बेष्ट नेगेटिभ एक्टरय् नोमिनेशन, अन्तर गाविस नृत्य प्रतियोगिताय् ल्यू सिरपाः, स्कूलय् फूटबल कासाय् यक्व सिरपाः, स्कूलय् एक्टिभ स्टुडेण्ट सिरपाः त्याकेत ताःलायेधुंकूम्ह खः ।

“निफ्वः स्वां” संकिपाया लुखां थ्व ख्यलय् दुहांवःम्ह स्वतन्त्र संसार महर्जन आःतकया दुने निफ्वः स्वां, ए… जि यम्ह, जिपिं बदमास मखु, थ्व जिगु नुगःमिखा दुम्ह कां, माया, धाःसा पत्याः मजू, इहिपा लगायत छगू दर्जनं मल्याक संकिपाय् थीथी भूमिकाय् थःगु अभिनय न्ह्यब्वये धुंकल । थुकी मध्ये गुलिखे संकिपाय् हिरो हे जुयाः म्हितल । छुं छुं संकिपाय् पाहां कलाकारकथं जक नं ख्वाः ब्वल ।

अले “इहिपा” नांयागु छगू संकिपाय् नेगेटिभ रोल हे जूसां मेनरोल म्हिताः थः छम्ह “भर्सटाइल” कलाकार खः धकाः क्यन । वय्कःभाजु अभिनयया खँय् जक भर्सटाइल मखसे प्रतिभाय् नं बहुप्रतिभा दुम्ह कलाकार खः । अले थःगु प्रतिभा ब्वयेगु झ्वलय् वय्कः भाजुं संकिपाय् हुलाप्याखं स्यनामि (कोरियोग्राफर) ल्वापुख्यापु स्यनामि (एक्सन कोअर्डिनेटर) जुयाः नं ज्या याये धुंकलसा “ए… जि यःम्ह,” “पियाच्वना” व “हसना” नांयागु स्वंगू संकिपाया निर्देशन नं यायेधुंकल ।

न्हापांगु पलाः
थःत बहुप्रतिभाया धनीया रुपय् म्हसीका न्ह्यब्वयेत ताःलाःम्ह स्वतन्त्रं निगू तगिमय् आखः ब्वनाच्वंगु इलय् हे “सुदन कुमार” नांयागु दबू प्याखनय् छम्ह गरिबम्ह मचाया रोल म्हितूगु खः । उगु इलय् वयागु अभिनय थुलि ताःलात कि अन दबू प्याखं स्वयाच्वपिं सकल स्वकुमितय्गु नुगः ख्वयेका बिल । स्वतन्त्रया अबु तेजकुमार महर्जन नं थःगुु ईया छम्ह तसकं लोकंह्वाःम्ह कलाकार खः ।

अबुया हःपाः दयाः हे स्वतन्त्र थः स्वतन्त्ररुपं कलाकारिता ख्यलय् न्ह्याः वनेफुगु खः । कलाकारिता वयागु पारिवारिक देन धकाः धाःसां पाइमखु । वयात मचाबलय् खोनाया बागमति खुसिइ यंकाः लालकायेगु स्यम्ह नं वया थःहे अबु खः । उलि जक मखसे वयात जिम्नास्टिक, हाइजम्प, लंगजम्प नं वया अबुं हे स्यनाबिउगु खः । स्वतन्त्रया दाजु छम्ह नं दु, पवित्र कुमार महर्जन । दाजुम्ह नं कला ख्यलय् नुगः क्वसाःम्ह हे खः ।

स्वतन्त्रयाके तःताजि प्रतिभा दु । तर छु नं तालिम वा अध्ययनं सयेकूगु मखु । थःगु जीवनय् थः अबु छम्ह बाहेक मेम्ह गुरु मदु धयादी स्वतन्त्रं ।

न्हापा थीथी एफएमय् नेवाः ज्याझ्वः न्ह्याके धुंकूम्ह पवित्र छम्ह नाटक निर्देशक नं खः । दाजु पवित्रं निर्देशिन याःगु आपालं नाटकय् स्वतन्त्र हिरो जुयाः म्हितूगु दु । आखः, मनूया मिखा, कर्तव्य, ध्वगिगु समाज, आसांद्याःम्ह मिसा, अज्याःगु हे छु छुं प्याखंया नां खः, गुगु प्याखंत स्वतन्त्रं म्हितल अले वया दाजु पवित्रं स्यन अर्थात् निर्देशन यात ।

दाजु किजा अले तिपूया खँ
दाजुम्ह निर्देशक अले किजा कलाकार जूगुलिं खोनाय् उमित तुलसि घिमिरे व श्रवण घिमिरे धकाः तकं धाइगु । खोनाय् जुइगु थीथी सांस्कृतिक ज्याझ्वलय् स्वतन्त्र छम्ह अनिवार्यकथं दया हे च्वनीगु । मदइगु नं गनं मचांनिसें न्ह्याःगु वयागु कलाकारिताया पलाखय् वयात अबु व दाजुया जक साथ दुगु मखसे जीवनपासा तकं थ्व हे ख्यःयाम्ह चूलाःगु दु ।

झिन्यादँ झिंखुदँया नच्चागु वैशय् दबू प्याखनय् हिरो जुयाः म्हितेगु सुरु याःम्ह स्वतन्त्रया गुलिखे प्याखनय् प्रेमशोभा नांयाम्ह छम्ह ल्यासे हिरोइन जुइगु । प्रेमशोभा नं नृत्य कलापाखे नुगः क्वसाःम्ह खः । नृत्यय् निपुणम्ह खः । नापनापं प्याखनय् म्हितूबलय् इमि नुगलय् मतिनाया स्वां नं ह्वल ।

तर उमेरं मगाःनिगुलिं यानाः झिन्यादँतक पिइमाल । उकिं हे गबलें गबलें स्वतन्त्रयात वया तिरिमय्जु प्रेमशोभां थथे नं धाइगु हँ, “महाद्यःलिसे ब्याहा याये दयेमा धकाः पार्वती च्वंगु तपस्यासिबें जिं छंगु लागि च्वनागु झिन्यादँतकया तपस्या छुं कम मजू ।”

तिरीमय्जुया तिबः
मचाबलय् निसें कलाकारिता ख्यलय् नुगः क्वसायेका वयाच्वंम्ह स्वतन्त्रयात जीवन पासा नं थ्व ख्यलय् मतिना दुम्ह हे लात । स्वतन्त्रयात वयागु कलाकारिता ख्यलय् सदां साथ नं बिल । वयागु दकलय् न्हापांगु संकिपा “निफ्वः स्वां” दयेकूगु इलय् प्रेमा (प्रेमशोभायात स्वतन्त्रं प्रेमा धकाः सःतीगु जुयाच्वन ।) छम्ह डे«स डिजायनर अले हेयर डे«सर जुयाः ग्वाहालि यात ।

एम्स मुभिज धकाः छगू कम्पनी नीस्वनाः न्ह्याकूगु थ्व पलाखय् लिपा “ए… जि यःम्ह” नांयागु फिल्म तँसा जुयाः वल । पासापिं व परिवारं तिबः बिउगुलिं हे थः छम्ह कलाकारकथं धस्वाये फुगु खः धाइम्ह स्वतन्त्रं थःगु संकिपा अभिनय जीवनया न्हापांगु न्हिया शुटिंगया ई लुमंकल ।

स्वतन्त्रं धाःकथं न्हापांगु शुटिंग खोनाया कार्यविनायकया देगः दुने जूगु खः । अन गीता शाहीलिसे इहिपाया लु शुटिंग जूगु खः । शुटिंग जक जूसां अन तयारी धाःसां धात्थेंया इहिपासिबें कम मजू । गुरुजु धात्थेंयाम्ह । छेँजःपिं धात्थेंयापिं । पाहाँपिं धात्थेंयापिं । इहिपाया हलज्वलं धात्थेंयागु ।

अन ब्वंगु मन्त्र नं धात्थेंयागु । उलिमछि जूबलय् ला स्वतन्त्रयात छक्वः ला तसकं हे मछिना वल हँ । “तर शुटिंग नि खः नि धकाः मति तया” स्वतन्त्रं धाल । संजोग ला छु धाःसां उगु इलय् शुटिंगया ज्याकःमि जुयाः ज्या यानाच्वंपिं सकलें लिपा स्वतन्त्रया धात्थेंया इहिपाबलय् न्हापा गथे खः अथे हे वया न्ह्यःने लिउने दनाच्वन ।

दयेत ला क्यामेरा नं दु तर शुटिंगया मखु । सक्कली इहिपाया लुयात क्यामेरा दुने स्वथना च्वन । स्वतन्त्रयात स्वयेबलय् न्ह्याम्हं ल्यासेतय्त झुमि यंकेगु तागत दु । तर वयात धाःसा प्रेमाया मतिनां चित । इमि यःत्यःया स्वाहाने गयाच्वंगु इलय् नं स्वतन्त्रयात प्रपोज याःवःपिं मेपिं मदुगु मखु, दु । तर स्वतन्त्रयात अज्याःगु इनापं बिचलित मयाः ।छाय्धाःसा प्रेमालिसेया वयागु मतिना पवित्र मतिना खः ।

मेगु लजगाः व सामाजिक सेवा
स्वतन्त्रयाके तःताजि प्रतिभा दु । तर छु नं तालिम वा अध्ययनं सयेकूगु मखु । थःगु जीवनय् थः अबु छम्ह बाहेक मेम्ह गुरु मदु धकाः धाइम्ह स्वतन्त्रं टेलिभिजनय् वइगु गीतान्जली, प्रतिभाको दबली थेंज्याःगु आपालं प्रोग्राम स्वयाः कलाया ज्ञां लानाकाःगु खःसा लिपा वनाः थः स्वयम् नं अज्याःगु ज्याझ्वःया निर्णायक तकं जुल । इमेज च्यानलय् वइगु “प्रतिभा दबू” छगू अज्याःगु हे ज्याझ्वः खः ।

गुकि स्वतन्त्र छम्ह निर्णायक जूगु खः । “जि गुरु जुइ नं गुबलें चेला जुइ मनं” धकाः धाइम्ह स्वतन्त्रया मू लजगाः धइगु ग्राफिक्स डिजायन व प्रिन्टिङ्ग खः । वयागु हे प्रिन्टिङ्ग प्रेसय् “तोरी लाहुरे” नांयागु कलिउड फिल्मया टि–शर्टत छापे याःगु खःसा थौंकन्हय् नेवाः मनोञ्जनया ख्यलय् जुइगु आपालं ज्याझ्वःया प्रचार हलंज्वलं डिजाइन नं स्वतन्त्रं हे याना वयाच्वंगु दु । थःगु लजगाः बाहेक वयागु नुगः थौंकन्हय् सामाजिक सेवाय् नं क्वसायाच्वंगु दु ।

स्वतन्त्रं थःगु बुन्हि आदर्श सौल उच्च माध्यमिक विद्यालय, अपाङ्ग सेवा संघ खोनाया असक्त मस्तय् दथुइ हनेगु याना वयाच्वंगु दुसा इमिगु नितिं नं ग्वाहालि जुइकथं थःगु संकिपाया च्यारिटी शोतक यायेधुंकूगु दु । मनय् सेवा भावया स्वां ह्वल कि व झन् झन् तफ्वः जुयावनी धइगु खँ स्वतन्त्रं पुष्टि याःगु दु । छाय्धाःसां स्वतन्त्र थौंकन्हय् सानेपाया मेघा हस्पिटलया प्रमोटिङ्ग मेनेजर जुयाः नं ज्या यानाच्वंगु दु । व नं लजगा कथं मखु, सेवा भावं यानाच्वंगु दु ।

दकलय् लिपा
थौंकन्हय् विशेष यानाः नेपालभाषाया सांगितिक व मनोरञ्जनात्मक ज्याझ्वःया ग्वसाः ग्वयेगुली नुगः क्वसायेका वयाच्वंम्ह स्वतन्त्रं दँय्दसं मोहनिया लसताय् सांगितिक ज्याझ्वः यायेगु याना वयाच्वंगु दुसा थुगुसि निसें नेवाः कलाकःमिपिंत हनेगु ज्या नं न्ह्याकूगु दु । थुकथं कलाकारिता ख्यलय् सकृय रुपं पलाः न्ह्याका वयाच्वंम्ह स्वतन्त्र थ्व ख्यःया छम्ह ज्वःमदुम्ह व्यक्तित्व खः ।

 

सम्बन्धित बुखँ

LEAVE YOUR COMMENTS