कीर्तिपुर ः अ लिजेण्ड अफ कीर्तिलक्ष्मी
पृथ्वी नारायण शाहयात स्वनिगः त्याके मालाच्वनि । नेपाल मण्डलय् कब्जा यायेमालाच्वनि । तर स्वनिगः दुहां वयेगु मू लुखाः मत्यायेकं थ्व सम्भव मदु । सक्वः त्याकल । तर किपु त्याकेफइमखु । पृथ्वी नारायण शाहया जवल्हाः धका धयातःम्ह सेनापति कालु पाण्डेया नेतृत्वय् किपुलिइ हमला याइ । तसकं बांमलाक ल्वापु जुइ ।
थ्वहे ऐतिहासिक बाखंया लिधंसाय् वासुपासां च्वयातःगु कृति “भैरव सिंह” उपन्यासया लिधंसा कया दयेकातःगु थ्व फिल्मया नां “कीर्तिपुर—अ लिजेण्ड अफ कीर्तिलक्ष्मी” धकाः छुनातःगु दु । थ्व खस नेपाली भाषां दयेकूगु फिल्म खः । अथेजूसां थुकी नेवाः कलाकार व प्राविधिकतय्गु सहभागिता यक्व दु ।
थथे जूगुया मू कारण धइगु थ्व नेवाः अस्तित्वलिसे स्वापु दुगु बाखं जुया खः अले थुकिया लगानीकर्तात नं नेवाःत हे जूगुलिं नं खः ।
येँया कीर्तिपुर, स्वनिगःया थीथी थाय् लगायत नुवाकोट व गोरखाय्तकं शुटिंग जूगु थ्व फिल्मयात नेपाःया हे छगू बिस्कं महत्वं जाःगु फिल्मया रुपय् तयार यानागु धइगु दावी थ्व फिल्मया निर्देशक प्रदिप खडगीं याःगु दु ।
थौंसिबें निसत्याः दँ न्ह्यःया कीपुयात नं फिल्मया पर्दाय् न्ह्यब्वयेया निंतिं कम्प्युटरया लिधंसा कयाः भिएफएक्स (भिजुअल इफेक्ट्स) छ्यलातःगु “कीर्तिपुर” फिल्मय्, किपुलिइ पृथ्वीनारायण शाहया सैनिकं हमला याइबलय् छगू युद्धया नेतृत्व याःम्ह विरांगना कीर्तिलक्ष्मीं क्यंगु साहसया बाखं न्ह्यब्वयातःगु दु ।
“राजमति” व “चाण्डालिका” थेंज्यागु निगू बिस्कं बिस्कं महत्वंजाःगु नेवाः फिल्मय् मू भूमिका म्हिताः बय्बय् जूम्ह हिसिला महर्जनं थुकी कीर्तिलक्ष्मीया मू भूमिका म्हिता तःगु दु । कीर्तिलक्ष्मीया युवा रुपय् अन्जला नकःमिया नं थुकी बांलाःगु भुमिका दु । अले कीर्तिलक्ष्मीया जहान ज्ञान प्रजाया रुपय् हिसिलाया थःहे जहान मणिराज लवटं म्हिताच्वंगु दु ।
“राजमति” धुंकाः नीन्यादँ लिपा हाकनं छक्वः फिल्मया पर्दाय् खनेदयेक वयेत्यंम्ह मणिराजया निंतिं थ्व छगू हाथ्या जूसां न्हापा “राजमति” म्हितूबलय् नेवाः भाय् मसःया तसकं थाकूगु तर आः “कीर्तिपुर—अ लिजेण्ड अफ कीर्तिलक्ष्मी” धाःसा खस भाषं दयेकूगुलिं उलि थाकु मजूगु खँ मणिराज लवटं कन ।
किपूया बाखं अले प्याखं दयेकीपिंनं किपूयापिं हे जूगुलिं जकं हिसिला महर्जनयात मू भुमिका बिउगु खःला धइगु न्ह्यःसः ब्वलनीगु स्वाभाविक हे खः । तर थ्व फिल्मया आर्ट डाइरेक्टर के.के. मानन्धरया धापु कथं हिसिलायात किपूया म्ह्याय्मचा जूगुलिं हे जक काःगु मखु धइगु खनेदु ।
हिसिलासिबें न्हापा मेपिं छम्ह निम्हेसिया नामय् नं बिचाः याःगु खःसां नुगः क्वसाये मफुत । अले तिनि हिसिलाया नां क्वःछिउगुुुुुु खः ।
मुक्कं दांजक पीन्यागू लाख लाय् तूगु थ्व फिल्मय् नीगूनिसें नीन्यागू लाखतकाया ज्याया लगानी फोकस पिक्चर्सं याःगु दु । थुकी दुने शुटिंगयात माःगु सकतां हलंज्वलं निसें कयाः शुटिङ्ग धुंकाः माःगु सकतां प्राविधिक ज्या नं फोकस पिक्चर्सया लगानी जूगु दु ।
कीर्तिलक्ष्मीयात छम्ह काल्पनिक पात्रया
रुपय् जक मखसे
छम्ह ऐतिहासिक वीराङ्गना धकाः नाले धुंकूगु अवस्था दुसा कीर्तिपुरया युद्धपार्कय् कीर्तिलक्ष्मीया झ्वाता तकं तइगु जूगु दु ।
थुकी विशेष यानाः भिएफएक्सया ज्याय् अप्वः ई लगे जूगु खँ नं निर्देशक प्रदिप खडगीं कनादिल । अले भिएफएक्सया सकतां ज्या सन्तोष के.सीं. याःगु खः । थ्व ल्याखं थ्व फिल्मया मुक्कं लाय् धइगु ख्वीन्यागू लखतका सिबें अप्वः जूवंगु दु । “कीर्तिपुर—अ लिजेण्ड अफ कीर्तिलक्ष्मी” दयेकूगु पुचलं थ्व फिल्म दयेकेत स्वदँ न्ह्यवंनिसें अनुसन्धान यानागु दावी याःगु दु ।
तर गुलिखे मनूतसें “भैरव सिंह” उपन्यासया गुलिखे पात्र काल्पनिकजक खः धकाः नं धयाच्वंगु दु । फिल्मया स्क्रिनप्ले च्वमि के.के. मानन्धरया धापू कथं साहित्य व संकिपाय् थथे इतिहासया लिधंसा कयाः काल्पनिक पात्रया बाखं न्ह्यःब्वइगु सामान्य खँ खः । नेपाःया फिल्मख्यःयात हे स्वयेगु खःसा “बसन्ती” व “सेतो बाघ” अज्याःगु हे फिल्म खः ।
किपूयात यलया अधिनय् स्वसासित लागा धकाः धाइपिं नं दु । यलया मल्ल जुजु सिद्धिनरसिंह मल्लया काय् श्रीनिवास मल्लं किपुलिइ राज याःगु धकाः धाइपिं नं दु । थ्व अनुसन्धानया विषय खः । न्ह्याःगु हे जूसां किपुलिइ आःतक नं लाय्कू धइगु थाय् दनिगुलिं अन न्हापा शासन याइपिं शासक दूगु खँ बांलाक हे क्यँ धइगु खँ निर्देशक प्रदिप खडगीं न्ह्यथनादिल ।
थुकथं किपूया थीथी ऐतिहासिक व साँस्कृतिक पक्षयात न्ह्यब्वयेगु कुतः जुयाच्वंगु थ्व फिल्मया स्वम्ह सह–निर्माताय् प्रेम खड्गी, बीरेन्द्र ताम्राकार व अनन्त श्रेष्ठ च्वनादीगु दु ।
आपालं भूमिकाय् नेपाःया नांजाःपिं कलाकारतसें अभिनय याःगु थ्व फिल्मय् पृथ्वी नारायण शाहया रुपय् एसराज गराच, काजी धनबज्रया रोलय् मदनदास श्रेष्ठ, बीर नरसिंहया रुपय् विनोद श्रेष्ठ, मकर सिंहया रुपय् सुशील राजोपाध्याय, मानबीरया रुपय् सुन्दरलाल श्रेष्ठ, भुयुमायाया रुपय् लक्ष्मी गिरी, चिनीमायाया रुपय् मञ्जु श्रेष्ठ, सुरप्रतापया रुपय् सुनील भट्टराई, कालु पाण्डेया रुपय् उदय श्रेष्ठया नापनापं सुरबीर पण्डित, सञ्जय शर्मा राजोपाध्याय, शिला साय्मि, रश्मी नापित लगायत आपालं कलाकारपिंसं अभिनय यानातःगु दुसा सिनेमाटोग्राफी नवीन जोशी व शंकर महर्जन, द्वन्द उदय श्रेष्ठ, मेकअप अमृत मरहठ्ठा व डे«स डिजाइन उद्धवराज भट्टराईं जुंगें याःगु खः ।
प्यदँन्यादँति न्ह्यः हे तयार जूगु थ्व फिल्मयात उगु ईया सरकारं सेन्सर पास तकं मयाःगु खँ थनथाय् लुमंकेबहः जू । थ्वहे हुनिं याना आतक च्यारिटी शोलय्जक लिकुनाच्वंगु थ्व फिल्मया आपालं आपाः च्यारिटी शो जुइधुंकुगु दुसा आः वयाः थ्व फिल्म थ्वहे वइगु असारया १३ गतेनिसे देय् न्यंकं रिलिज जुइत्यंगु दु ।
नेपाःया इतिहासया छगू हाकुगु पाना कथं कयातःगु पृथ्वीनारायणं कीर्तिपुर त्याकूगु घटनाया ज्वलन्त लु कःघाना तःगु थ्व फिल्म नेपाली फिल्मया स्वकुमिया निंतिं न्हूगु सवाः जुइगु खँया दावी निर्देशक प्रदिप खडगीं यानादीगु दुसा उलिजक मखसे नेपाःया इतिहासय् नुगः क्वसाःपिनिगु निंतिं नं “कीर्तिपुर ः द लिजेण्ड अफ कीर्तिलक्ष्मी” अध्ययनय् छगू न्हूगु पलाः जुइ धकाः वय्कलं दावी यानादीगु दु ।
कीर्तिलक्ष्मीयात छम्ह काल्पनिक पात्रया रुपय् जक मखसे छम्ह ऐतिहासिक वीराङ्गना धकाः नाले धुंकूगु अवस्था दुसा कीर्तिपुरया युद्धपार्कय् कीर्तिलक्ष्मीया झ्वाता तकं तइगु जूगु दु । थ्व ल्याखं थ्व छगू स्वयेबहगु फिल्मया रुपय् सकसिनं ययेकीगु आशा फिल्म पुचलं यानाच्वंगु दु ।
LEAVE YOUR COMMENTS