प्रदेश प्रमुख व अस्थायी राजधानी तोके यात

येँ– सरकारं न्हय्गुलिं प्रदेशया प्रदेश प्रमुख व अस्थायी राजधानी तोके याःगु दु । नकतिनि क्वचाःगु मन्त्रिपरिषद्या बैठकं न्हय्गुलिं प्रदेशया प्रमुख व अस्थायी राजधानीबारे निर्णय याःगु खः ।

प्रधानमन्त्री निवास बालुवाटारय् जूगु बैठक लिपा कानुन मन्त्री यज्ञबहादुर थापां प्रदेश प्रमुख व अस्थायी राजधानी बारे निर्णय जूगु जानकारी बियादीगु खः । वय्कःया कथं प्रदेश १ य् गोविन्द सुब्बा, २ लय् रत्नेश्वरलाल कायस्थ, ३ य् अनुराधा कोइराला, ४ य् बाबुराम कुँवर, ५य् उमाकान्त झा, ६ लय् दुर्गाकेशर खनाल व ७ य् मोहनराज मल्लयात प्रदेश प्रमुख नियुक्त याःगु दु ।

अथेहे अस्थायी राजधानी प्रदेश नं. १ या विराटनगर, २ या जनकपुर, ३ या हेटौंडा, ४ या पोखरा, ५ या बुटवल, ६ या सुर्खेत व ७ या धनगढी तोके याःगु दु । प्रदेश सभाया न्हापांगु बैठक आः अस्थायी राजधानी तोके याःथाय् हे जुइ ।

प्रदेश प्रमुख जूपिं मध्य १ नम्बरया सुब्बा अग्रेजी प्राध्यापक खः, २ या कायस्थ पुलांम्ह कृषिसचिव व जलस्रोतविद खः, अथेहे ३ या प्रमुख कोइराला माइती नेपालया संस्थापक समाजसेवी खःसा ४ या कुँवर पुलांम्ह महान्यायाधिवक्ता खः । अथेहे प्रदेश नं. ५ या झा पुलांम्ह स्वास्थ्य सचिव व पुलांम्ह स्वास्थ्य मन्त्री खः । ६ नं. प्रमेख खनाल बुद्धिजीवी खःसा ७ या मल्ल राजनीतिज्ञ खः ।

प्रदेश प्रमुखय् कांग्रेस, राष्ट्रिय जनता पार्टी व संघीय समाजवादी फोरमं भागबण्डा यानाः काःगु खः । प्रदेश प्रमुख जूपिं सकलें थुपिं स्वंगू पार्टीया सतिक दुपिं खः ।