नगदेशय् थीथी ज्याझ्वः यासें स्वांयाःपुन्हि हन

थिमि – नगदेश बौद्ध समूहया ग्वसालय् २५६३ क्वःगु स्वांयाःपुन्हि थीथी ज्याझ्वः यासें हन । भगवान बुद्धया जन्म, संबोधी ज्ञान लाभ व महापरिनिर्वाण जुयाबिज्याःगु त्रिसंयोग चूलाःगु दिं स्वांयाःपुन्हिया लसताय् नगदेश बुद्ध विहारया धम्महलय् उगु ज्याझ्वः जूगु खः ।निगू चरणय् न्ह्याःगु ज्याझ्वलय् दकलय् न्हापां बुद्धपूजा जूगु खः ।

वयां लिपा मध्यपुर थिमि नगरपालिकाया प्रमुख मदनसुन्दर श्रेष्ठया प्रमुख आतिथ्यता व धर्मकीर्ति विहारया अनागारिका केशावति गुरुमांया विशेष आतिथ्यताय् निगूगु चरणया ज्याझ्वः जूगु खः ।निगूगु चरणया ज्याझ्वःया उलेज्या मूपाहां नगरप्रमुख श्रेष्ठं दीप प्रज्वलन यासें बुद्धया किपाय् स्वां देछानाः यानादीगु खः ।

समूहया कोषाध्यक्ष रत्नभक्त हायँजुं लसकुस यानादीगु ज्याझ्वलय् समूहया सचिव कृष्णकुमार प्रजापतिं स्वांयाःपुन्हि व भगवान बुद्धया जीवनीया बारे चर्चा यानादिल । विशेष पाहां अनागारिका केशावति गुरुमां नं बुद्धया जीवनीपाखें प्रेरणा कयाः उकियात थःगु व्यवहारय् लागू यानाः हिउपाः हयेगु स्वयेमाः धयाबिज्यात ।

मूपाहां नगरप्रमुख श्रेष्ठं भगवान बुद्धया शिक्षायात अनुशरण यानाः निःस्वार्थ, इमान्दार, नैतिकवान जुयाः विकासया ज्याय् समर्पित जुइगु हे धाथेंया अर्थय् बुद्धया उपासक उपासिका जुइगु खः धयादिल । लिसें वय्कलं थः मध्यपुर थिमिया विकास निर्माणया ज्याय् समर्पित जुयाः न्ह्यचिला च्वनागु नं धयादिल ।

समूहया दुजः हरि प्रजापतिं सुभाय् देछानादीगु ज्याझ्वः समूहया अध्यक्ष दीपकराज साँपालया सभापतित्वय् जूगु खः । निगूगु चरणया ज्याझ्वःया अन्त्य लिपा पुण्यानुमोदन यासें उपस्थित सकसितं भोजन याके धुंकाः भगवान बुद्धया पवित्र अस्थि धातुया दर्शन याकेगु ज्या जूगु खः । वयां लिपा बुद्ध मूर्तियात खतय् तयाः थीथी सांस्कृतिक बाजंसहित नगदेशया नगरपरिक्रमा याःगु खः ।