सहकारी नियमन यायेगु कानुनया अभाव

येँ – सरकारं समृद्ध नेपाल व सुखी नेपाली दयेकेगु लक्ष्य तयाः सहकारी ख्यःयात व्यवस्थित यानाः गरिबी न्यूनिकरणय् छ्यलेगु खँ धाःगु दु । थ्व क्षेत्रया दर्ता, नियमन, अनुगमन व नीति दयकेगु ज्याय् आः स्वंगुलिं तहया सरकारया अधिकार व भूमिकायात प्रभावकारी दयेकेगु तयारी सुरु जूगु दु ।

स्थानीय तहपाखें सहकारीया दर्ता, प्रदेशं विशेष अनुगमन व संघं सहजकर्ताया रुपय् आवश्यक नीति निर्माण परिमार्जन यानाः ग्वाहालि यायेगु खँ भूमि व्यवस्था तथा सहकारी मन्त्रालयया सचिव गोपीनाथ मैनालीं कनादीगु दु । वित्तीय पहुँच मथ्यंगु गामय् नं सहकारीया माध्यमं जनताया जीवनस्तर सुधार हयेत व गरीबी निवारण यायेगु लक्ष्य सरकारं तयातःगु दु ।

वंगु आर्थिक दँया असार मसान्त तक देय्न्यंकं ३४ हजार ५१२ सहकारी स्थापना जूगु दु । विषयत क्षेत्रया सहकारी संस्था जूगु जूसा निक्षेप संकलन व बचत परिचालनय् अप्वः सहकारी केन्द्रीत जूगु खनेदु । थ्व क्षेत्रयात नियमत यायेत निर्देशिक आःतकं मदुगुलिं विकृति अप्वयाच्वंगु खँ मन्त्रालयं धाःगु दु ।

२५ करोड तका स्वयां अप्वःया वित्तीय कारोवारया विवरण नेपाल राष्ट्र बैंकय् थ्यंकेमाःगु व्यवस्थाया तयारी नं सरकारं याःगु दु । सहकारीया महत्व अप्वःसां नं थुकियात नियमत यायेगु कानुनी व्यवस्था मदुगुलिं भूमि, सहकारी तथा गरिबी निवारण्ढा मन्त्रालयं ऐन, नियमावली दयेकेगु तयारी अन्तिम चरणय् थ्यंकूगु दु ।

सहकारीया मूल्यमान्यता व उद्देश्य कथं ज्या मजूगुलिं अप्वः थें सहकारी समस्याग्रस्त जुयाच्वंगु मन्त्रालयया प्रवक्ता जनकराज जोशीं धयादिल ।सहकारीया सिद्धान्त, भावना, मर्म अःखः थीथी थासय् लगानी याःगुलिं १३० गू सहकारीया बारे गुनासो वयाच्वंगु व थुकी मध्ये नं झिगू सहकारी जोखिमय् लानाच्वंगु खँ धाःगु दु ।

सहकारी संख्यात्मक रुपं अप्वःसां गुणात्मक रुपं अप्वये मफु’

प्रष्ट नियमया अभावं ठगी याइगु सहकारी व उकिया संचालकयात कारवाही यानाः सर्वसाधारणया निक्षेप लित बिइफुगु मदु । ऐन दयेके धुनेवं नियमावली व निर्देशिका दयेकेगु खँ प्रवक्ता जोशीं धयादीगु दु । वय्कलं धयादीगु दु, ‘फुऽं कानुन दयेकेधुंकाः सहकारीयात व्यवस्थित दयेकेत ग्वाहालि जुइ ।’

न्हूगु दयेकीगु ऐनय् संघीयताया मर्मकथं सहकारी दर्ता व नियमनया जिम्मेवारी स्थानीइ तहयात दइगु खँ प्रवक्ता जोशीं धयादिल । न्हापा केन्द्रं हे दर्ता, संचालन व नियमन याइगु व्यवस्था दुगु खः । स्थानीय तहयात जिम्मेवार दयेकेबलय् व थःम्हं हे नियमन नं यायेफइ । वय्कलं धयादीगु दु, ‘स्थानीय स्तरड्ढ ज्या जुइगु जूगुलिं उकिया दर्ता निसें अनुगमन तक स्थानीय निकायपाखें हे यायेगु आवश्यक दु ।’

संविधानया मर्म कथं अप्वः जिम्मेवारी स्थानीय निकाययात बियातःगु दुसां स्थानीय निकाययाके नं कानुन धाःसा मदुनि । गुलिखे स्थानीय तहं कानुन दयेकेत स क्षमत तकं मदुगु खँ उपनिर्देशक दीपक खड्कां धयादिल ।मन्त्रालययं थज्याःगु स्थानीय निकायय् नमूनाया रुपय् कानुन दयेकाबीगु योजना दु ।

वय्कलं धयादिल, ‘न्हापां ऐन लागु जुइवं उकि बाझे मजुइकथं स्थानीय तहं कानुन दयेकेमाः ।’सहकारीइ संख्यात्मक रुपं अप्वःसां गुणात्मक रुपं अप्वये मफुगु खँ उपनिर्देशक खड्कां धयादीगु दु ।सहकारी ग्रामीण क्षेत्रय् स्वयां शहरी क्षेत्रय् केन्द्रीत जुयाच्वंगु दु । उत्पादनमुखी स्वयां नं ऋण तथा बचत सहकारी अप्वः दु ।

गुलिखे सहकारीं बहुउद्देश्ीय धकाः यक्व क्षेत्रय् ज्या यानाच्वंगु दु । वय्कलं धयादिल, ‘यक्व सहकारी दुजःतय् हीत स्वयां नं नाफा कमे यायेत हे लगे जुयाच्वंगु दु ।’न्हूगु ऐनय् सहकारी अभियान्तायात समेत दुथ्याकेगु उद्देश्य मन्त्रालयया दुगु खँ उपनिर्देशक खड्कां धयादिल । वइगु इलय् उत्पत्तिया प्रमाणपत्र सहकारी महासंघपाखें बीकेगु तयारी जुयाच्वंगु दु ।

वय्कलं धयादीगु दु, ‘थुकिं वइगु दिनय् अभियन्ताया सहभागिता नं अप्वयेका यंकेगु योजना दु ।’सहकारीइ थौंकन्हय् यक्व कथंया विकृति वयाच्वंगु प्रवक्ता जोशीं धयादिल । आम नागरिकया जीवनस्तर थकायेगु उद्देश्यं स हकारीया सुरुवात जूगु खःसां नं यक्व संस्थां अज्याःकथं ज्या याःगु मदु ।

वय्कलं धयादिल, ‘माक्व नियमन यायेमफुगुलिं नं १८ प्रतिशत तक ब्याज कायेगु ज्या जुयाच्वंगु दु ।’ अथेहे गुलिखे सहकारी यक्व रकम मुंकाः सदस्यतय् सम्पर्कय् तकं वयाच्वंगु मदु ।

वंगु असार मसान्तया तथ्यांक कथं देन्यंकं मुक्कं ३४ हजार ५१२ सहकारी दर्ता जुयाच्वंगु दु । सहकारीइ जक ३०२ अर्ब शेयर पुँजी परिचालन जुयाच्वंगु दु । देन्यंकं दुगु सहकारीं ३७४ अर्ब लगानी यानाच्वंगु दुसा करिब ६० हजारयात रोजगार बियाच्वंगु दु । सहकारीया कूल गार्हस्थ उत्पादनय् ४ प्रतिशत योगदान दु ।

 

सम्बन्धित बुखँ

LEAVE YOUR COMMENTS