कर्मचारीतय्त १० प्रतिशत हे बोनस बीत सर्वोच्चया फैसला

येँ – बैंक, वित्तीय संस्था, बीमा थेंज्याःगु नाफामूलक कम्पनीया कर्मचारीतय् बोनस अप्वइगु जूगु दु । सर्वोच्च अदालतं कर्मचारीतय्त बोनस बीबलय् कर काटे याये न्ह्यःया नाफा पाखें बोनस बीमाःगु फैसला यायेवं कर्मचारीतय् बोनस अप्वइगु जूगु खः । कर्मचारीतय्सं आः वंगु दँया नाफा पाखें हे बोनस कायेखनीगु जूगु दु ।

कम्पनी ऐन कथं नाफाया १० प्रतिशत बोनस कर्मचारीतय्त बीमाः । तर कर कार्यालयं बोनस छुटे याये न्ह्यः हे कर कायेगु व्यवथा यानातःगुलिं कर्मचारीतय् १० प्रतिशत धाःसा कर्मचारीतय् ल्हातय् ९.०९ प्रतिशत जक बोनस लाइगु जुयाच्वंगु खः । आः सर्वोच्च अदालतं कर काटे याये न्ह्यःया लबः पाखें हे बोनस बीत फैसला याःगु खः ।

सर्वोच्चया न्यायाधीशपिं केदारप्रसाद चालिसे व प्रकाशमान सिंह राउतं कर काटे याये न्ह्यः हे १० प्रतिशत बोनस छुटे यायेदइगु फैसला न्यंकूगु खः । थ्व आदेशया कारणं आः कर्मचारीतय्त १० प्रतिशत हे बोनस ल्हातय् लाइगु जूगु दु ।करया कारणं म्हो जक बोनस ल्हातय् लानाच्वंगुलिं पर्साय् च्वंगु इन्दूशंकर चिनि उद्योगया कर्मचारीतय्सं मुद्दा दायर याःगु खः ।

थ्व मुद्दाय् फैसला यासें न्यायाधीसतय्सं ऐनया व्याख्या यायेगु निकाय कर कार्यालय मखु, सर्वोच्च अदालत खः धासें १० प्रतिशत बोनस बीत आदेश बिउगु खः ।इन्दूशंकरया कर्मचारीतय्सं तःगु थ्व मुद्दां यानाः फुक्कं नाफामूलक कम्पनीया कर्मचारीतय्त फाइदा जूगु दु ।

बैंकतय्सं नं आः कर्मचारीतय्त नाफाया १०प्रतिशत हे बोनस बीगु जूगु दु । थुकिया निंतिं बैंकर्स संघय् जूगु बैठकय् सर्वोच्च अदालतया निर्णय सकसियां निंतिं बाध्यबारी धासें १० प्रतिशत हे कर बीगु क्वःछिउगु खः ।