राष्ट्रपति ल्यज्याय् एमाले–माओवादी अझ नं तनाव

येँ (नेपालभाषा टाइम्स)- नेकपा एमालेया अध्यक्ष केपी ओलीं आःया समीकरण जन्मे जूगु इलय् हे राष्ट्रपति नेकपा एमालेया जुइ धकाः च्वयातःगु खँ धयादीगु दु । विराटनगर विमानस्थलय् पत्रकारतलिसे खँ ल्हासें वय्कलं धयादिल, ‘राष्ट्रपति सु जुइ धइगु खँ न्हापा हे क्वःछिना तयेधुंकूगु दु । थ्व ला आःया समीकरण जन्म जूगु इलय् जातलय् हे च्वयातःगु खँ खः ।’

माओवादी नेता जनार्दन शर्मां ला सहमति जूगु मसिउ धयाच्वन नि धकाः पत्रकारतय्सं न्यंगु न्ह्यसःया लिसः बिसें अध्यक्ष ओलीं धयादिल, ‘फुकलिसे ला गन सहमति जुइ धकाः । माओवादी कार्यकर्तातलिसे सहमति यायेगु जुइ ला ?’

राष्ट्रपतिइ फुकसिया सहमति जुइमाः धइगु सः थ्वयाच्वंगु दु नि धइगु खँय् वय्कलं धयादिल, ‘सही खँ खः, जिमिसं उम्मेदवार थनेगु जुइ, उकी हे फुकसिया सहमित जुइमाः ।’

आःया समीकरण सोच विचार यानाः हे दयेकूगु खः धासें वय्कलं राष्ट्रपतिया उम्मेदवारयात नेकपा माओवादी केन्द्रं नं समर्थन याइगु विश्वास प्वंकादिल । तर राष्ट्रपति पदय् एमालेया उम्मेदवार सु जुइ ले धइगु खँय् वय्कलं धयादिल, ‘व ला फागुन १३ गते सार्वजनिक यायेगु जुइ ।’ न्हूम्ह राष्ट्रपति ल्ययेत फागुन १३ गते मनोनयन दर्ता यायेगु ई क्वःछिनातःगु दु ।

थ्वहे झ्वलय् माओवादी केन्द्रया महासचिव देव गुरुङं फुक्कं राजनीतिक पार्टीं समर्थन यायेफुम्ह व्यक्तियात राष्ट्रपति दयेकेगु खँ धयादीगु दु । म्हिगः पोखराय् जूगु पत्रकार सम्मेलनय् वय्कलं उगु खँ धयादीगु खः ।

वय्कलं धयादिल, ‘राष्ट्रिय अस्मिताय् खतरा ब्वलनेफु, अराजकता व अस्थिरता ब्वलनेफु व उकिं यानाः संविधान व राष्ट्रियताय् जोखिमय् लाइगु जूगुलिं राष्ट्रिय सहमतिं हे राष्ट्रपति ल्ययेमाः ।’

न्ह्याग्गु हे दलं राष्ट्रपति प्रस्ताव याःसां नं गणतान्त्रिक संविधानया संरक्षक, हिउपाःयात आत्मसात यायेफुम्ह, फुकस्यां समर्थन यायेफइम्ह व्यक्तियात राष्ट्रपति दयेकेमाः धइगु हे थःपिनिगु अडान जूगु खँ नं वय्कलं धयादीगु दु । उकथं हे महासचिव गुरुङं माओवादीं सु गुम्ह पात्रया मखुसें वैचारिक व नीतिगत खँ ल्ह्वनागु खः धासें स्थिरता व राष्ट्रियताया नितिं राष्ट्रिय सहमति व सहकार्य माःगु खँ धयादीगु दु ।

सम्बन्धित बुखँ

LEAVE YOUR COMMENTS