कमलाछिया नासः भजन खलःया सतः पुनःनिर्माण याइगु

येँ – थनया असं–कमलाछि त्वालय् च्वंगु नासः भजन खलःया सतः पुनःनिर्माण याइगु जूगु दु । सतः पुनःनिर्माणया निंतिं क्षमा पुजा यायेगु नापं शिलान्यास यायेगु ज्या जुल ।येँ मनपा २७ वडाया असं कमलाछि त्वालय् च्वंगु सतलय् भजन खलकं परापूर्वकालंनिसें संरक्षण, संवद्र्धन व दँय्दसं थीथीकथंया पुजा यायेगु नापं भजन संचालन याना वयाच्वंगु खः ।

२०७२ बैशाख १२ गतेया तःभुखाचं क्षति जूगु भजन खलःया सतः पुनःनिर्माणया निंतिं वंगु बैशाख २९ गते क्षमा पुजानापं शिलान्यास यायेगु ज्या जूगु खः । भजन खलःया नायः द्वारिकाप्रसाद श्रेष्ठपाखें क्षमा पुजा व शिलान्यास यानाः सतः पुनःनिर्माणया ज्या न्ह्याकूगु खः ।

उगु इलय् येँ क्षेत्र नं ७या प्रतिनिधिसभा सदस्य नापं पुलांम्ह रक्षामन्त्री भीमसेनदास प्रधान, नेपाल रेडक्रस सोसाइटी येँ जिल्ला शाखाया सभापति मथुराराम श्रेष्ठ, स्थानीय समाजसेवीपिं ज्ञानरत्न तुलाधर, दिलचन्द्रानन्द वैद्य, योगेशकुमार खड्गीलिसें त्वाःया विशिष्टि व्यक्तिपिनिगु उपस्थिति दुगु खः ।

अथे हे क्षमा पुजा व शिलान्यासया इलय् असन सेवा समिति, असन कमलाछि टोल सुधार समिति, लूनिभाः स्वास्थ्य क्लिनिक, झी पासा गुथि कमलाछि युवा समूह, अन्नपूर्ण क्लब (आरसीटी) लगायत थीथी संघसंस्थाया प्रतिनिधितय्गु नं उपस्थिति दुगु खः ।

स्थानीय त्वाःवासी, समाजसेवी व संघसंस्थाया आर्थिक ग्वाहालिं भजन खलःया सतः स्वलाया दुने पुनःनिर्माण क्वचायेकेगु लक्ष्य कयागु खलःया सचिव राधाकृष्ण नकःमिं जानकारी बियादीगु दु ।