कन्हय् ग्वलय् विरोध प्रदर्शन, पशुपति विकास कोषया पदाधिकारीतय्गु राजीनामा माग

येँ (नेपालभाषा टाइम्स) – पशुपति क्षेत्र विकास यायेगु नामय् पशुपति विकास कोषं हःगु न्हूगुगुरुयोजना विरुद्ध स्थानीय जनतां कन्हय् सांस्कृतिक प्रदर्शन यायेत्यंगु दु। उगु गुरुयोजना लागू यात धाःसा उगु वडाया द्वलंद्वः जनता विस्थापित जुइगु जूगुलिं गुरुयोजना खारेज यायेमाः धइगु माग यासें स्थानीय जनतां कन्हय् शनिवाः थ्व प्रदर्शन यायेत्यंगु खः ।

कन्हय् जुइगु प्रदर्शन लिसें गुरुयोजनां याइगु क्षति बारे जानकारी बीगु लागिं थौं छगू पत्रकार सम्मेलन नं यायेत्यंगु दु। गुरुयोजना विरुद्ध स्थानीय जनतां आशामान संगत व कृष्णमान श्रेष्ठयात संयोजक दयेकाः ‘पशुपति क्षेत्र संयुक्त संघर्ष समिति’ नामं संस्था नं गठन याःगु दु। संघर्ष समितिया सचिव केदारमान भण्डारीं कनादी कथं कन्हय् ग्वलं सांस्कृतिक रुपं पिकाइगु उगु विरोध जुलुसय् ग्वल क्षेत्रया थीथी बाजं लिसें लाखे प्याखं व मेमेगु झाँकी समेत पिकायेगु ग्वसाः जुयाच्वंगु दु। यदि पशुपति क्षेत्र विकासया नामय् अन च्वनीपिं स्थानीय जनतायात विस्थापित यात धाःसा थ्व क्षेत्रय् प्रचलित थुपिं संस्कृतित नष्ट जुया वनी धइगु क्यनेगु लागिं सांकेतिक रुपं थ्व प्रदर्शन यायेत्यनागु खँ नं सचिव भण्डारीं कनादिल ।

उगु लागाया जनतां विरोध स्वरुप थौंकन्हय् छेँय् छेँय् हाकुगु ध्वाँय् ब्वयेकेगु व थाय्थासय् हाकुगु ब्यानर खायेगु ज्या नं याना वयाच्वंगु दु ।

स्वंगू वडाया निद्वःखा छेँ थुनेगु ग्वसाः
पशुपति विकास कोषं आः तयार याःगु थुगु गुरुयोजना कार्यान्वयन यात धाःसा येँ मनपा वडा नं. ७, ८ व ९ या स्थानीय जनताया करिब २ हजारखा छेँ थुने मालीगु खनेदु धाःगु दु। थ्व स्वयां न्ह्यः पशुपति विकास कोषं वि.सं. २०५९ सालय् १५ या लागिं धकाः छगू गुरुयोजना लागू याःगु खः । उगु गुरुयोजना लागू याःगु इलय् ३०० खा स्वयां अप्वः छेँ थुनाः अन च्वनीपिं मनूतय्त विस्थापित याना छ्वःगु खः ।

आः न्ह्यःने हःगु गुरुयोजना लागू जुल धाःसा थ्व स्वयां नं अप्वः मनूत विस्थापित याये मालीगु अवस्था वइगु खँ धाःगु दु। थ्व गुरुयोजना लागू जुल धाःसा स्थानीय मनूतय्त विस्थापित यानाः अन कलेज, योगकेन्द्र, ध्यानकेन्द्र, धर्मशास्त्र ब्वनेगु केन्द्र आदि दयेकेगु धकाः तयारी यानाच्वंगु दु। ग्वल लागाया स्थानीय जनतायात विस्थापित याना छ्वःबलय् पशुपति लागाय् प्रचलित आपालं जात्रापर्व, नखःचखः आदि लोप जुयावंगु खः । लिसें स्थानीय जनता विस्थापित जूगुलिं पशुपति लागाया द्यः व देगः तकं असुरक्षित जूगु खः ।

सम्बन्धित बुखँ

LEAVE YOUR COMMENTS