दइ ला शिक्षकयात सरकारी सरह तलब ?

येँ (नेपालभाषा टाइम्स)- येँ महानगरपालिकां मनपा दुने लाःगु फुक्क हे निजी स्कुलतय्सं नं थः शिक्षकतय्त सरकारी शिक्षक सरह हे तलब बीमाः धकाः हःगु व्यवस्था आः तक लागू मजूनि । मनपां गनं नं स्कुलय् सरकारी स्कुलय् स्वयां कम तलब बियातःगु दुसा मनपाय् उजुरी तः वा, मनपां उकिया आधारय् कारावाही यायेगु जुइ धकाः सुचं पिकाःगु खः । तर मनपां सुचं पिकाःगु निवाः दइन, आः तक सुं छम्हेस्यां हे अज्याःगु उजुरी तः मवःनिगु खँ मनपाया शिक्षा विभागं धाःगु दु ।

उजुरी हे आः तक सुनां हे तः मवःनिगु कारणं कारवाही न्ह्याके मफुगु खँ नं विभागं धाःगु दु । तर निजी स्कुलय् ब्वंकीपिं शिक्षक–तय्सं धाःसा उजुरी तः मवःसां मनपा थम्हं हे तलबबारे न्यनेकने याये फइगु खँ धाःगु दु । मनपां फुक्क स्कुलयात थःपिनि तलब स्केल छ्वया हजि धाःसा स्कुलतय्सं तुरुन्त हे छ्वया हइगु जूगुलिं उजुरी तः वा धकाः हालाच्वनेम्वाःगु खँ धाःगु दु ।

सम्बद्ध शिक्षकतय्सं धाःकथं थम्हं आखः ब्वंकाच्वंगु स्कुलया विरुद्ध उजुरी तयेगु ज्या सुं नं शिक्षकं याइ मखु । यदि यात हे धाःसां वयागु रोजगारीया सुरक्षा मदयेफु । नापं अधिकांश निजी स्कुलतय्सं सरकारी सरह तलब बी फइगु अवस्था नं मदु । उकिं उजुरी हे तःसां तलब बी फइगु सम्भावना मदुगु जूगुलिं मनपां पिकाःगु थ्व सुचंया अर्थ मदुगु खँ नं उमिसं धाःगु दु ।

तर मनपां धाःसा आः बजेट सेसन सिधयेवं हे स्कुल स्कुलय् वनाः हे उमिगु तलब स्केल बुझे यायेगु व कम तलब बीगु स्कुलतय्त कारवाही यायेगु जुइ धकाः धाःगु दु ।