अन्तर्राष्ट्रिय सञ्चार माध्यम न्ह्यःने उत्तर कोरियां परमाणु केन्द्र नष्ट याइगु
उत्तर कोरियां थःथाय्यागु परमाणु परीक्षण केन्द्र नष्ट यायेगु निंतिं मे २३ निसें सुरु जुइगु स्वन्हुया ज्याझ्वलय् अन्तर्राष्ट्रिय सुरक्षा विज्ञ व अन्तर्राष्ट्रिय सञ्चार माध्यमयात सःतेगु खँ धाःगु दु । उत्तर कोरियाया सरकारी समाचार संस्था केसिएनएं परीक्षण केन्द्रय् च्वंगु फुक्क सुरुङत विस्फोटक पदार्थ तयाः थुना छ्वयेगु, थन दुहां वनीगु लुखा प्वाः तिइगु व पर्यवेक्षण यायेगु केन्द्रया लिसें अनुसन्धान भवनत चिइकूगु खँ धाःगु दु ।
अमेरिकी राष्ट्रपति डोनाल्ड ट्रम्प व उत्तर कोरियाली नेता किम जङ अन दथुइ सिंगापुरय् ऐतिहासिक शिखर वार्ता जुइ न्ह्यः उत्तर कोरियां परीक्षण केन्द्र नष्ट यायेत्यंगु खः । वार्ताया स्ववाः न्ह्यः जुइत्यंगु थ्व ज्याझ्वलय् दक्षिण कोरिया, चीन, बेलायत व रुसी पत्रकारतय्त ब्वति कायेकेबीत्यंगु खः ।
थ्वहे दथुइ उत्तर कोरिया थ्यंम्ह संयुक्त राष्ट्र संघीय खाद्य कार्यक्रम डब्लुएफपीया प्रमुख डेभिड बिजलं उत्तर कोरियायात नेतातय्के ‘सकारात्मक धारणा’ ब्वलनाच्वंगु विश्वास थःत जूगु खँ धयादीगु दु । डेभिड बिज उत्तर कोरियाली सरकारं खटे यानातःपिं सहजकर्तात लिसे राजधानी प्योङयाङय् निन्हु व प्योङयाङं निन्हु चाःहिला वयेधुंकाः थ्व खँ धयादीगु खः ।
उत्तर कोरियां पोषणसम्बन्धी मापदण्ड चूलाकेगु निंतिं कडा मेहनत यानाच्वंगु व भोकमरीया अवस्था नं सन् १९९०या दशकय् थें मदुगु खँ वय्कलं धयादीगु दु । वय्कलं धयादीगु दु, ‘इतिहासया न्हूगु पाना पुइकेगु बिचारय् दु ।’छुं न्हि न्ह्यवनिसें उत्तर कोरिया व विश्वया मेमेगु देय् दथुया स्वापुतिइ नाटकीय हिउपाः वःगु खः ।
छुं ला न्ह्यव तक उत्तर कोरियां याःगु श्रृंखलाबद्ध परमाणु व क्षेप्यास्त्र परीक्षणं अमेरिकालिसे युद्धया स्थिति तक ब्वलंकाबिउगु खः । तर आः नाटकीय रुपं उत्तर कोरियाली नेतां अमेरिकी राष्ट्रपतियात नापलायेत्यंगु दुसा छुं न्हि न्ह्यव दक्षिण कोरियाली राष्ट्रपतियात नापलायेधुंकूगु दु ।
वइगु जुनया १२ तारिखय् निम्ह नेतात दथुइ सिंगापुरय् शिखर बार्ता जुइत्यंगु खः । उत्तर कोरियां थःपिंसं ज्वनातयापिं स्वम्ह अमेरिकी नागरिकतय्त अमेरिकाय् लित छ्वयेवं अमेरिकां वार्ताया तिथि घोषणा याःगु खः ।
LEAVE YOUR COMMENTS