थनिंनिसें आरआर क्याम्पसय् नेपालभाषा ब्वंकल
येँ – रत्न राज्यलक्ष्मी क्याम्पस (आरआर क्याम्पस)य् थनिंनिसें नेपालभाषा विषय ब्वंकूगु जूगु दु । क्याम्पसय् नेपालभाषा विषय ब्वने दयेमाः धकाः विद्यार्थीतय्सं ताःई न्ह्यवंनिसें माग याना वयाच्वंगु खः । न्हापा नेपालभाषा विषय ब्वंका वयाच्वंगु खःसां लिपा विद्यार्थी म्हो जूगु धकाः करिब प्यदँ न्ह्यः क्याम्पस प्रशासनं नेपालभाषा विषय ब्वंकेगु बन्द याना बिउगु खः ।
तर वंगु छुं ई न्ह्यवंनिसें क्याम्पसय् स्नातक तहय् ब्वनाच्वंपिं विद्यार्थीतय्सं थःपिंसं नेपालभाषा विषय कयाः ब्वने दयेमाः धकाः क्याम्पस प्रशासनयात इनाप याःगु खः । उगु इलय् नं क्याम्पस प्रशासनं खास हे चिउताः मक्यंगु अवस्थाय् विद्यार्थीतय्सं नेपालभाषा विषय ब्वंकेगु व्यवस्था यायेत दबाव बीगु ज्यातकं याःगु खः ।
विद्यार्थीतय् दबाव लिपा आः वयाः क्याम्पस प्रशासनं नेपालभाषा विषय ब्वकेगु निर्णय याःकथं थनिनसें नेपालभाषा ब्वंकूगु खः । आरआरय् नेपालभाषा विषय ब्वंकेया निंतिं प्राध्यापकया व्यवस्था नेपालभाषा केन्द्रीय विभागं याःगु खः ।
आरआर क्याम्पस प्रमुख, नेपालभाषा केन्द्रीय विभागया पदाधिकारी, स्वतन्त्र विद्यार्थी युनियनया प्रतिनिधि व प्राध्यापकतय् दथुइ जूगु छगू सहलह लिपा क्याम्पसय् नेपालभाषा विषय ब्वंकेगु निर्णण् याःगु खः । थौकन्हय् क्याम्पसय् नेपालभाषा विषय कयाः ब्वनीपिं विद्यार्थीया ल्याः झिंन्याम्ह दु ।
LEAVE YOUR COMMENTS