श्रीलंकाया प्रधानमन्त्रीइ महिन्दा राजापाक्ष

एजेन्सी – श्रीलंका पोदुजाना पेरामुना पार्टीया नेता व पुलांम्ह राष्ट्रपति महिन्दा राजापाक्षं आइतवाः श्रीलंकाया प्रधानमन्त्री पदया शपथ कयादीगु दु ।

संसदया निर्वाचनय् पेरामुना पार्टीं बहुमत हयेवं महिन्दा राजापाक्ष प्रधानमन्त्रीइ नियुक्त जुयादीगु खः । राजापाक्षं श्रीलंकाया राजधानी कोलेम्बोया पिनेया लागाय् च्वंगु केलानीया बौद्ध देगलय् ग्वसाः ग्वःगु भव्य समारोह दथुइ प्रधानमन्त्री पदया शपथ ग्रहण यानादीगु खः । राजापाक्षं श्रीलंकाय् थ्व लिसें प्यक्वःगुखुसी प्रधानमन्त्री पदया शपथ कयादीगु खः ।

राजापाक्षया दल पेरामुनां वंगु अगष्ट ५ य् क्वचाःगु चुनावय् २२५ सिट मध्ये १४५ सिट त्याकेत ताःलाःगु खः । वय्कलं न्हूगु मन्त्रिपरिषद्या घोषणा थ्व हे वाःया अन्तपाखे यानादी । श्रीलंकाया निर्वाचन आयोगया कथं वंगु बुधवाः श्रीलंकाय् इतिहासय् हे दकलय् शान्तिपूर्वक निर्वाचन क्वचाःगु खः । कोरोना भाइरसया हामारीया दथुइ नं थ्व चुनावय् ७१ प्रतिशत मतदान जूगु खः ।

श्रीलंकाली राष्ट्रपति गोटाबाया राजापाक्षया कथं न्हूगु संसदया बैठक वइगु अगस्ट २० निसें सुरु जुइ । श्रीलंकाया इतिहासय् किजाम्ह गोटाबाया राष्ट्रपति व दाजु महिन्दा राजापाक्ष छगू हे इलय् देय्या निगूगु सर्वोच्च राजनीतिक पदय् थ्यंपिं जूगु दु ।