नरेन्द्र मोदी मुस्ताङय् तपस्या च्वनेधुंकूगु अनुमान

येँ – भारतीय प्रधानमन्त्री नरेन्द्र मोदी थौं जनकपुर जुयाः नेपाः भ्रमणय् झायेत्यंगु दु । थौं हे वय्कः हिमाली जिल्ला मुस्ताङया मुक्तिनाथ नं झायादी । मोदीं थ्व स्वयां न्ह्यः नं मुक्तिनाथ वनेगु इच्छा प्रकट यानादीगु खः । तर पूवने मफुत । थुगुसी केवल निन्हुया लागिं नेपाः वयाच्वंगु इलय् नं वय्कः मुक्तिनाथ झाइगु जूगु दु ।

आखिर मुक्तिनाथप्रति प्रधानमन्त्री मोदीया थपाय्धंगु आस्था छाय् ?वय्कःया पुलांगु इतिहास बारे सिउपिं मनूतय्सं धाः कथं भाजु मोदी थ्व स्वयां न्ह्यः नं मुक्तिनाथ झायेधुंकूगु दु । झाःगु जक मखु वय्कः अन छुं न्हि च्वनाः ध्यान व तपस्या समेत याना वंगु खः । मुक्तिनाथय् च्वंपिं छुं ध्यानीतय्सं आः तक नं वय्कःया उगु तपस्यायात लुमंकाच्वंगु खँ धायेगु याः ।

वय्कः १७–१८ दँ ति दुगु इलय् इहिपा जुइवं न्हूम्ह कलाःयात त्वःताः पिहां झाःगु खः । छुं दँ तक वय्कः भारतया थीथी तीर्थस्थलय् वनाः च्वनादिल । वहे इलय् सन् १९७० पाखे वय्कः नेपाः वयाः तप्यंक मुक्तिनाथय् तपस्या च्वं वंगु खँ धायेगु याः ।
भारतय् वय्कःया गृहराज्य गुजरातय् स्वामी नारायण सम्प्रदायया छगू पवित्र तीर्थस्थल कथं मुक्तिनाथयात कायेगु याः ।

उगु सम्प्रदायया प्रमुख गुरु स्वामी नारायणं मुक्तिनाथय् हे तपस्या च्वनाः ज्ञान प्राप्त यानादीगु धापू दु । नरेन्द्र मोदी नं स्वामी नारायण सम्प्रदायया हे छम्ह साधक खः । उकिं थःगु सम्प्रदायया महान गुरुं तपस्या च्वनाः ज्ञान प्राप्त याःगु थाय् जूगुलिं वय्कः नं अन हे वंगु अनुमान दु ।

अबले मुक्तिनाथं लिहां वयेधुंकाः तिनि वय्कः राष्ट्रिय जनसेवा दलय् सदस्य जुयादीगु व वयां लिपा भाजपाय् दुहां वनाः राजनीति सुरु यानादीगु खः ।भाजु मोदीया जीवनया थ्व पक्षयात पुष्टि याइगु छुं नं कथंया लिखित दस्तावेज धाःसा मदु । लिसें वय्कःया बारे च्वयातःगु छुं नं सफुली थुकिया बारे छुं उल्लेख नं जुयाच्वंगु मदु ।मुस्ताङय् धाःसा वय्कः झाइगु निश्चित जुइवं लसकुस यायेत भव्य तयारी जुइधुंकूगु दु ।