शपथ सिधल, आः सरकार

येँ (नेपालभाषा टाइम्स)- न्हू निर्वाचित जूपिं सांसदतय् म्हिगः शपथ ग्रहण क्वचायेवं आः न्हूगु सरकार गठनया प्रक्रियापाखे राजनीतिक दलतय् ध्यान केन्द्रित जूगु दु । राष्ट्रपति विद्यादेवी भण्डारीं कंस पुस १० गते तकया दुने बहुमत सांसदतय् समर्थन सहित सरकार गठनया लागिं दावी यायेत ई बियातःगु खः ।

थ्वहे झ्वलय् नेकपा माओवादी केन्द्रया अध्यक्ष पुष्पकमल दाहालं आः गठबन्धनया हे सरकार दयेकेगु खँ धयादीगु दु । म्हिगः सांसदतय् शपथ ग्रहण ज्याझ्वलय् सञ्चारकर्मीत लिसे खँ ल्हासें वय्कलं उगु खँ धयादीगु खः ।

वय्कलं सरकार गठनया प्रक्रिया सहज रुपय् न्ह्याः वनेगु खँ नं धयादीगु दु । गठबन्धनया सरकारय् न्हापांखुसी सु प्रधानमन्त्री जुइ धकाः सञ्चारकर्मीतय्सं न्यंगु न्ह्यसःया लिसः बिसें वय्कलं धयादिल, ‘सल्लाह जुयाच्वंगु दु ।’

थ्व स्वयां न्ह्यः पार्टीया संसदीय दलया नेता चयन जूम्ह दाहालं संसदीय दलया बैठकय् थःगु नेतृत्वय् सरकार दयेकेगु खँय् कांग्रेस सभापति शेरबहादुर देउवा व नेकपा एकीकृत समाजवादीया अध्यक्ष माधव नेपाल लिसे सहलह यायेगु खँ धयादीगु खः

थ्वहे झ्वलय् नेकपा (एस) या अध्यक्ष नेपालं नं वर्तमान सत्ता गठबन्धनं हे सरकार दयेकेगु खँ धयादीगु दु । म्हिगः संसदय् पत्रकारतलिसे खँ ल्हासें वय्कलं उगु खँ धयादीगु खः । भाजु नेपाल म्हिगः अस्पतालं वयाः शपथ ग्रहण यानाःलि हानं अस्पतालय् तुं लिहां झाःगु खः ।

थ्वहे झ्वलय् सूत्रतय्सं धाःकथं माओवादी केन्द्रया अध्यक्ष दाहालं यदि थःत न्हापां प्रधानमन्त्री दयेके बीगु जुल धाःसा राष्ट्रपति पद कांग्रेसयात त्वःता बीगु शर्त न्ह्यःने तयादीगु दु । कांग्रेसं धाःसा राष्ट्रपति व प्रधानमन्त्री निगुलिं पदय् दावी यानाच्वंगु दु । निगुलिं पद कायेगु लागिं कांग्रेसं एमालेलिसे समेत खँल्हाबल्हा यानाच्वंगु खँ नं सूत्रं धाःगु दु ।