प्रहरी महानिरीक्षक खनाल इन्टरपोलया महासभाय् ब्वति कायेत चिलीपाखे

येँ – प्रहरी महानिरीक्षक सर्वेन्द्र खनाल इन्टरपोलया ८८ क्वःगु महासभाय् ब्वति कायेत चिली झायादीगु दु ।चिलीया सान्टियागोय् थनिंनिसें कात्तिक १ गते तक न्ह्याःगु इन्टरपोलया ८८ क्वःगु महासभाय् ब्वति कायेगु निंतिं वय्कः उखेपाखे झायादीगु खः ।

प्रहरी महानिरीक्षक खनाललिसें उगु महासभाय् ब्वति कायेत प्रहरी प्रधान ज्याकू केन्द्रीय अनुसन्धान ब्यूरोया प्रमुख प्रहरी नायब महानिरीक्षक निरजबहादुर शाही व प्रहरी प्रधान ज्याकू इन्टरपोल शाखाया प्रमुख प्रहरी वरिष्ठ उपरीक्षक उमेशराज जोशी नं उखेपाखे झायादीगु दु ।

एनसीबी नेपालया प्रमुखतकं जुया च्वनादीम्ह प्रहरी महानिरीक्षक खनालया नेतृत्वय् वंगु पुचःयात प्रहरी अतिरिक्त महानिरीक्षक, प्रहरी नायब महानिरीक्षक लगायत वरिष्ठ प्रहरी अधिृकतपिंसं त्रिभुवन अन्तर्राष्ट्रिय विमानस्थलय् भिंतुना देछासे विदाइ यानादीगु खः ।इन्टरपोल विश्वव्यापी प्रहरीया सहयोगी व अपराध नियन्त्रणया निंतिं ग्वाहालि याइगु संस्था खः ।

अन्तर्राष्ट्रिय फौजदारी प्रहरी संगठनयात हे सामान्य भासं इन्टरपोलया नामं म्हसिकेगु याना वयाच्वंगु दु । विश्वया १९४ राष्ट्र सदस्य जुयाच्वंगु थुगु संगठनया मुख्यालय फ्रान्सया लियोन सहरय् दु । थुगु संगठनया संस्थापक जोहानेस स्कोबर खःसा थौंकन्हय् थुगु संस्थायात अलेक्जेन्डर प्रोकेप्चुकं नेतृत्व याना वयाच्वंगु दु । महासभाय् थीथी झिंगुंगू विषयय् व्यापक सहलह जुइगु प्रहरी प्रधान ज्याकुथिं न्ह्यथंगु दु ।