ने. सं. ११४६ बछलागा दशमी -

दंगु चिनी हयेके मबीत इनाप

भारतीय चिनी दुहां मवःसा हानं थिके जुइगु

येँ – भारतय् सरकारं चिनीया भावय् अनुदान बीगु क्रम जारी हे याना तःगुलिं नेपाःया चिनी उत्पादकतय्त समस्या जूगु दु । भारतय् सरकारं चिनीया भावय् प्रति किलो ११ तका अनुदान (सब्सिडी) बीगु यानातःगु दु । यदि थ्व चिनी नेपाः दुहां वल धाःसा नेपाःया चिनीं थ्वलिसे प्रतिस्पर्धा याये मफइगु जूगुलिं भारतीय चिनी नेपालय् अझ नं आयात याके मतेनि धकाः नेपाःया चिनी उत्पादकतय्सं नेपाः सरकारयात इनाप याःगु दु ।

भारतीय चिनीलिसे नेपाःया चिनीं प्रतिस्पर्धा याये मफइगु खने दयाः हे नेपालं वंगु आर्थिक वर्षय् भारतीय चिनी आयातय् प्रतिबन्ध तया बिउगु खः । वंगु असार महिना क्वचायेवं भारतीय चिनीइ तयातःगु थ्व प्रतिबन्धया म्याद नं क्वचाःगु दु । तर म्याद क्वचाःसां थ्व प्रतिबन्ध मेगु निला ति कायम याना बी माली धकाः चिनी उत्पादकतय्सं नेपाः सरकार समक्ष हानं निवेदन बिउगु खँ सीदुगु दु ।

नेपाःया चिनी उत्पादक महासंघं धाः कथं नेपालय् उत्पादन जूगु चिनी अझ मेगु स्वला प्यलायात गाक्क हे स्टक लानाच्वंगु दनि । यदि भारतया चिनी दुहां वल धाःसा स्टकय् लानाच्वंगु थ्व चिनी मी मफयाः उत्पादकतय्गु करोडौं तका डुबे जुइगु अवस्था वयेफु धासें उमिसं भारतीय चिनीइ तयातःगु प्रतिबन्ध तुरुन्त फुकुवा मयायेत इनाप याःगु खः ।

यदि उत्पादकतय्गु ध्यबा डुबे जुल धाःसा तु उत्पादन याइपिं कृषकतय्त नं ध्यबा बी मफइगु अवस्था वयेफु धासें उत्पादक महासंघं सरकारयात थ्व इनाप याःगु खः । तर मेखे यदि भारतीय चिनी दुहां वल धाःसा नेपाःया चिनी थिकयेक न्याये मालीगु खँय् धाःसा उपभोक्तात चिन्तित जूगु दु । नेपाः दुने नेपालय् हे उत्पादन जुइगु चिनी सिबें भारतीय चिनी दंक न्यायेदु ।

अथे जूगुया कारण भारतं थःगु देशय् उत्पादन जुइगु चिनीयात प्रति किलो ११ तका धइथें सब्सिडी बियातःगु दु । नेपाःया सरकारं अज्याःगु सब्सिडी मबिउ । थुकिं यानाः भारतय् स्वयां नेपालय् चिनी थिके जुइगु खः । मेखे तुयागु भाः सरकारं हे निर्धारण याना बिउगु कारणं यानाः चिनी थिके जूगु खँ उत्पादकतय्सं धाःगु दु ।

आः सरकारं तुया भाः गुलि निर्धारण याःगु खः उलि हे भावं थःपिंसं न्याये माःगु कारणं लागत अप्वःगु खँ उमिसं धयाच्वंगु दु । प्रतिस्पर्धी भावं तु न्याये दुगु जूसा दंक काये खनीगु नं उमिगु दावी दु । छुं जुयाः सरकारं उत्पादकतय्गु खँ न्यनाः भारतीय चिनीयात तयातःगु प्रतिबन्ध कायम हे याना तल धाःसा थुगु दँय् नं चिनीया भाः थहां वने फइगु खँ धाःगु दु ।