मरुसतः मौलिक विधिं दयेकीगु

येँ – मरुसतः पुनर्निर्माण पूवंक हे नेपाःया मौलिक विधि व शैलीं जुइगु जूगु दु । काष्ठमण्डप पुनर्निर्माण समितिं म्हिगः याःगु पत्रकार सम्मेलनय् न्ववासें समितिया नायः लिसें प्रदेश नं. ३ या सांसद राजेश शाक्यं मरुसतः पूवंक मौलिक शैलीं दयेकेगु निंतिं छुं नं कथंया सम्झौता मयायेगु खँ कनादिल ।

वय्कलं पुनर्निर्माणया निंतिं गठन जूगु विज्ञ समूहं बिउगु सल्हा कथं हे पुनर्निर्माण जुइगु खँ नं कनादिल । मरुसतः पुननिंर्माणया निंतिं डा. प्रेमराज मास्के, प्रा.डा. सुदर्शनराज तिवारी, कोषप्रसाद आचार्य व यज्ञमानपति वज्राचार्य दुथ्याःगु छगू विज्ञ पुचः दयेकूगु दु । पत्रकार सम्मेलनय् न्ववानादिसें समितिया सचिव गौतम डंगोलं पुनर्निर्माणय् छ्यलीगु सिँ, दाचि अप्पा, माअप्पा फुक्क परीक्षण यानाः जक छ्यलेगु खँ कनादिल ।

वय्कलं धयादिल, ‘दाचि अप्पा छ्यलेगु निंतिं थीथी थासय् उत्पादन जुयाच्वंगु दाचि अप्पाया नमूना हयाः परीक्षण यायेगु जुइ, यदि थ्व दाचि अप्पा आवश्यक मापदण्ड कथं मजुल धाःसा बरु उत्पादकयात हे इनाप यानाः माःगु कथंया मापदण्डसहितया अप्पा उत्पादन याकेगु जुइ ।’समितिं वइगु बछलागा चतुर्दशी (वैशाख ३१ गते) सोमवाः कुन्हु मरुसतलय् छगू क्षमा पुजा यानाः पुनर्निर्माणया ज्या शुभारम्भ यायेत्यंगु दु ।

सोमवाः सुथय् ९ बजे मरुसतलय् क्षमा पुजा जुइ । क्षमा पुजाय् संस्कृति मन्त्री रविन्द्र अधिकारी, प्रदेश नं. ३ या पूर्वाधार विकास मन्त्री केशव स्थापित, येँ मनपाया मेयर विद्या सुन्दर शाक्य, शताब्दीपुरुष सत्यमोहन जोशीपिनि सहभागिता दइ ।
पुनर्निर्माण ज्या न्ह्याकेगु निंतिं समितिं हनुमानध्वाखा जःखः वा व निभालं कयेक अथें तयातःगु मरुसतःया सिँ म्हिगः सुथंनिसें हे नाप कयाः ल्ह्ययेगु शुरु याःगु दु ।

स्वयंसेवी, नेपाली सेना, प्रहरीया ग्वाहालिं सिँ ल्ह्ययाः आःयात पुलांगु डीएसपी ज्याकुथी टहरा दयेकाः तयेगु ज्या जूगु खः । म्हिगः येँ मनपाया मेयर विद्यासुन्दर शाक्यं थम्हं हे सिँ ल्ह्ययाः थ्व ज्या आरम्भ यानादीगु खः । थुकी मध्ये ज्या वःगु सिँ पुनर्निर्माणय् छ्यलीगु खँ धाःगु दु ।