साउन दुने देउवा पुचःया राष्ट्रिय भेला

येँ (नेपालभाषा टाइम्स) – नेपाली कांग्रेसया देउवा पुचलं थ्व हे साउन दुने राष्ट्रिय भेला सःतीगु जूगु दु । आइतवाः छगू पत्रकार सम्मेलन यासें देउवाः पुचःया प्रचारप्रसा समिति संयोजक मीन विश्वकर्मां साउन दुने येँय् हे राष्ट्रिय भेला यायेगु निर्णय जूगु खँ कनादीगु खः । राष्ट्रिय भेलाया तिथि, ई व थाय् वइगु साउन ६ गते घोषणा यायेगु खँ नं विश्वकर्मां धयादीगु दु । वय्कलं बीपी कोइरालाया स्मृति दिवसया ज्याझ्वलय् राष्ट्रिय भेलाया ज्याझ्वः घोषणा यायेगु जानकारी बियादीगु खः ।

थौंकन्हय् कांग्रेस दुने आन्तरिक विवाद तच्वया वनाच्वंगु दु । विशेष महाधिवेशनं गगन थापा सभापति जुइधुंकाः देउवा पक्ष व थापा पक्ष दथुइ गुटबन्दी जुयाः विवाद तच्वया वनाच्वंगु दु । विशेष अधिवेशनं पार्टी नेतृत्वं पिने लाःवंगु देउवा पक्षयापिंसं पुलांम्ह कार्यवाहक सभापति पूर्णबहादुर खड्काया नेतृत्व संस्थापन पक्षविरुद्ध गतिविधि याना वयाच्वंगु दु । थ्व झ्वलय् आः औपचारिक रुपं हे राष्ट्रिय भेला यायेगु घोषणा याःगु खः ।

संस्थापन पक्षं पार्टी एकताया निंतिं सार्थक कुतः मयाःगु धासें राष्ट्रिय बहस व न्हूगु कार्यदिशक क्वःछीत भेला सःतेत्यंगु खँ विश्वकर्मां पत्रकार सम्मेलनय् धयादीगु दु । कांग्रेसय् विशेष महाधिवेशन क्वचाःगु न्हय्ला दयेधुंकूगु दुसा सार्वेच्च अदालतं न्हूगु नेतृत्वयात आधिकारिकता बिउगु नं प्यला फुइधुंकूगु दु । अथे खःसां निगू पक्ष दथुइ आन्तरिक कलह धाःसा ज्यंगु मदुनि । पत्रकार सम्मेलनय् इनाबिउगु विज्ञप्तिइ नगारिक अधिकार व लोकतन्त्रया रक्षाया निंतिं नीतिगत सहलह यायेत राष्ट्रिय भेला ग्वसाः ग्वयागु खँ धयातःगु दु ।