विज्ञप्तिया भाषायात आलोचना

येँ – सरकारं राष्ट्रिय सभाय् हःगु विधेयक म्हिगः लित काःसां नं भूमि व्यवस्था, सहकारी तथा गरिबी निवारण मन्त्री पद्माकुमारी अर्यालं जारी याःगु प्रेस विज्ञप्ति व थ्व बारे प्रधानमन्त्री खड्ग ओलीं म्हिगः पत्रकार सम्मेलनय् न्ववानादीगु भाषायात कयाः सामाजिक सञ्जालय् आलोचना याना हःगु दु ।

पत्रकार सम्मेलनय् पित बिउगु प्रेस विज्ञप्तियात कयाः सामाजिक सञ्जालय् विरोध शुरु जूगु खः । सामाजिक सञ्जालय् थ्व प्रेस विज्ञप्ति झंगः लायेगु कथं वयाच्वंगु धासें तत्काल उकियात विश्वास मयायेत व थौं जुइगु खबरदारी सभायात निरन्तरता बीमाःगु धकाः च्वयातःगु दु ।

गुलिस्यां थौं जुइगु ज्याझ्वः खनाः ग्यानाः विधेयक लित काःगु खः, खारेज याःगु मखु, हाकनं गुुगुं नं इलय् ताक लाकाः विधेयक पेश यायेफु धकाः धयातःगु दु । गुलिसिनं गुथि विधेयक खारेज मखु लित जक काःगु धकाः धयातःगु दु ।

अथे हे म्हिगः प्रम ओलीं थम्हं याःगु पत्रकार सम्मेलनय् गुथि विधेयक लित काल धाःगु खँ थम्हं नं समाचार ब्वनाः तिनि धकाः न्ववानादीगु खँयात कयाः नं सर्वसाधारणं आलोचना याना हःगु दु ।