विप्लवयात ग्वाहालि मयायेत ख्याच्वः

येँ – विप्लव नेतृत्वया नेपाल कम्युनिष्ट पार्टीयात गुगुं नं कथंया ग्वाहालि याइगु व्यक्ति वा संस्थायात नं कारबाही यायेगु ख्याच्वः गृह मन्त्रालयं बिउगु दु । गृह मन्त्रालयया प्रवक्ताया लिसे सहसचिव रामकृष्ण सुवेदीं म्हिगः छगू विज्ञप्ति पिकायेगु झ्वलय् उगु पुचःयात ग्वाहालि मयायेत अपिल यासें यदि गुगुं नं कथं ग्वाहालि यात धाःसा कारबाही जुइगु स्पष्ट याःगु दु ।

गृह मन्त्रालयया विज्ञप्तिइ धयातःगु दु, ‘विप्लव पुचः धकाः म्हसिउगु विध्वंशकारी व आतंककारी पुचःयात गुगुं नं कथंया ग्वाहालि मयायेत गृह मन्त्रालयं इनाप यानाच्वना, ख्यानाः वा जबर्जस्ती ध्यबा फ्वंगु खःसा प्रहरीयात सुचं बीत नं इनाप याना ।’थ्वहे झ्वलय् काभ्रे व यलया सिमानां शनिवाः ज्वंम्ह ‘विप्लव’ नेतृत्वया मध्य केन्द्रीय कमान्ड इञ्चार्ज हेमन्तप्रकाश ओली ‘सुदर्शन’या लिसे गुम्हेसिया विरुद्ध प्रहरीं प्यंगू मुद्दाय् अनुसन्धान न्ह्याकूगु दु ।

यल प्रहरी परिसरं हातहतियार तथा खरखजाना, विस्फोटक पदार्थ, संगठित अपराध व राज्य विरुद्धया अपराधया लिसें प्यंगू मुद्दाय् जिल्ला अदालतय् म्याद थप यानाः अनसन्धान न्ह्याकूगु खः । मेखे प्रहरीं विप्लवया नेता सुदर्शनयात ज्वंगु झ्वलय् थीथी महत्वपूर्ण दस्तावेज लूगु खँ धाःगु दु । सुदर्शनया पुचःलिसे दुगु ल्यापटप व मोबाइल आदिइ उकथंया महत्वपूर्ण दस्तावेज लूगु खः ।

सुदर्शनयात ज्वनेगु हे तःधंगु उपलब्धी धकाः प्रहरीं धयाच्वंगु इलय् दस्तावेज नापं लूगुलिं प्रहरीं थुगु कारबाहीयात विप्लव विरुद्धया तःधंगु सफलता कथं कयाच्वंगु खँ सीदुगु दु । प्रहरीं मध्य कमान्डया इञ्चार्ज सुदर्शनं यलया नख्खुइ जूगु बम विस्फोटनया जिम्मा थःपिंसं कयागु जुल धकाः वक्तव्य समेत जारी याःगु जूगुलिं संगठित अपराध मुद्दा आकर्षित जुइ धासें उकिया बारे थप अनुसन्धान जुइगु खँ धाःगु दु ।