एमसीसी बारे जसपाया निर्णय मवःनि

येँ (नेपालभाषा टाइम्स) – जनता समाजवादी पार्टीं अमेरिकी सहयोग परियोजना ‘मिलेनियम च्यालेन्ज कर्पोरेशन’ (एमसीसी) बारे आः तक छुं नं कथंया निर्णय मयाःनिगु खँ धाःगु दु। पार्टीया निम्ह अध्यक्षपिं महन्थ ठाकुर व उपेन्द्र यादवं मंकाः विज्ञप्ति जारी यासें एमसीसी बारे थःपिनिगु नीति व धारणा दयेकेगु निंतिं आन्तरिक सहलह जुयाच्वंगु खँ धाःगु दु ।

विज्ञप्तिइ धयातःगु दु, ‘थ्व सम्बन्धय् पार्टीं निर्णय याःगु मदुनि । पार्टीपाखें गुगुं नं कथंया धापू नं सार्वजनिक यानागु मदुनि ।’ जसपाया नेता राजेन्द्र श्रेठं नं एमसीसीया बारे पार्टीया आधिकारिक धारणा तयार मजूनिगु खँ धयादीगु दु। ‘नेपालभाषा टाइम्स’ लिसे खँ ल्हासें वय्कलं निर्वाचन आयोगं म्हीग तिनि पार्टी एकीकरण जूगु आधिकारिक पौ बिउगु जुयाः आः तक केन्द्रीय समितिया बैठक हे मच्वनागु खँ नं कनादीगु दु ।

वय्कलं नेपाःया अनलाइन मिडियां सम्प्रेषण याइगु आपालं समाचार फय्गं जुयाच्वंगु धासें अज्याःगु समाचार गनं वल धकाः अनलाइन मिडियां सम्बन्धित पार्टीया नेतातय्गु धापू तकं तयेगु कुतः मयाःगु द्वपं नं बियादिल । वय्कलं धयादी, ‘थौंकन्हय्या अनलाइन मिडियात कोखं न्हाय्पं यंकल धायेसातकि क्वःया लिउलिउ ब्वाँय् वनेगु यानाच्वंगु दु ।’