ध्यबा पुलादिसँ चःबि छ्यलादिसँ
येँया सतकय् गनं वनाच्वनीगु इलय् खि, च्व फायेमालाः चःबि मलुयाः उखेंथुखें जुइमाःगु अवस्था दुसा आः अज्याःगु स्थिति मदइगु जूगु दु । चःबि मामां वनेबलय् मलुयाः हथासं बाध्य जुयाः गनं होटल वा रेष्टुरेन्टय च्या च्वनेगु वा खाजा नयेगु त्वहः तयाः दुहां वनेमालीगु बाध्यता नं आः मदइगु जूगु दु ।
येँ महानगरपलिकां आः याकनं हे अज्याःगु समस्या ज्यंकेगु योजना न्ह्यःने हयेत्यंगु दु । येँ महानगरपालिकाया योजनाकथं महानगर दुने न्यय्गू होटल, रेष्टुराँ व क्याफेलिसेया सहकार्यय् अज्याःगु थासय् खि, च्व फायेगु निंतिं च्या त्वनेगु वा नसाज्वलं नः वनेगु त्वह तये म्वायेक हे चःबि वने फइगु व्यवस्था यायेत्यंगु दु ।
येँ मनपां यायेत्यंगु थुकथंया व्यवस्थायात वइगु दिनय् मेमेगु थासय् (होटल, रेष्टुरां व क्याफेय्) नं विस्तार याना यंकेगु योजना दयेकूगु दु ।
महानगरपालिकाया न्यय्गू होटललिसे उकथंया सम्झौता तकं जुइधुंकूगु येँ मनपा सहरी योजना आयोगया उपाध्यक्ष सरोज बस्नेतं कनादिल । वय्कःयाकथं अज्याःगु होटलय् महानगरवासीं छुं नं नसाज्वलं मनःसां नं चःबिया प्रयोग याये फइगु जूगु दु ।
तर उकिया निंतिं धाःसा शुल्क लगे जुइ । चःबि प्रयोग याःगु वापत पुलेमाःगु शुल्क लगायतया विषयय् धाःसा क्वःछी ल्यं दुगु वय्कं कनादिल । वय्कलं धयादिल, ‘दक्वं खँ क्वःजी धुंकाः जक अज्याःगु चःबि संचालनय् वइ ।’ आयोगं छुं ई न्ह्यः प्रतिस्पर्धापाखें हे महानगरया निंतिं न्हूगु योजना छनोट याःबलय् चःबिइ होटल÷रेष्टुराँ÷क्याफेलिसे सहकार्य यायेगु अवधारणा न्हाप लाःगु खः ।
महानगरपालिकाया योजनाकथं महानगर दुने न्यय्गू होटल, रेष्टुराँ व क्याफेलिसेया सहकार्यय् अज्याःगु थासय् खि, च्व फायेगु निंतिं च्या त्वनेगु वा नसाज्वलं नः वनेगु त्वह तये म्वायेक हे चःबि वने फइगु व्यवस्था यायेत्यंगु दु ।
वय्कलं धयादिल, ‘आः न्यय्गू संचालनय् हये धुंकाः मेमेगु नं थप जुया वनीगु विश्वास यानागु दु ।’देय्या हे दकलय् अप्वः जनसंख्या च्वना वयाच्वंगु येँ महानगरपालिकाय् सार्वजनिक चःबिया अवस्था धाःसा तसकं दयनीय दु । छखे अज्याःगु सार्वजनिक चःबिया ल्याः म्हो दुसा मेखे दुगु चःबिया नं उचित व्यवस्थापन जुइ फयाच्वंगु मदु ।
अप्वःथें सार्वजनिक चःबि सतकं फोहर जुयाः दुर्गन्ध न्यनाच्वंगु दुसा मिसातय्सं चःबि प्रयोग याये फइगु अवस्था नं मदु । महानगरापालिका दुने चःबिया ल्याः अप्वयेकेमाःगु व दुगु चःबियात सुचुकुचु यानाः संचालनय् हयेमाःगु महानगरवासीया माग दु । थ्व हे मागकथं येँ मनपां उकथंया योजना न्ह्यःने हःगु आयोगया उपाध्यक्ष बस्नेतं कनादिल ।
येँ मनपां थीथी थासय् सार्वजनिक चःबि निर्माण यायेगु व दुगु चःबिया स्तरोन्नतिनं यायेगु योजना दयेकागु वय्कलं धयादिल । वय्कलं कनादिल, ‘अप्वः चःबि आवश्यक जूगु थासय् चःबि निर्माणया निंतिं डिजाइन तकं यायेधुंगु दु ।’ महानगर दुने थौंकन्हय् संचालनय् दुगु ५७ गू सार्वजनिक चःबिमध्ये अप्वःथें चःबिया अवस्था बांलाः मजूगु वय्कलं धयादिल ।
महानगरं याःगु अनुगमनया लिधंसाय् अज्याःगु चःबिया स्तरोन्नति यायेगु योजना नं दयेकागु वय्कलं धयादिल ।आः सार्वजनिक चःबि दुगु थासय् लिक्कसं थीथी पसःत संचालन जुयाच्वंगु दु । वय्कलं धयादिल, ‘सुनां निर्माण याःगु खः, वं हे ध्यबा म्हयाच्वंगु दु । अथे खःसां चःबिया उचित व्यवस्थापन यायेगुपाखे धाःसा ध्यान बियाच्वंगु खनेमदु ।’
स्वनिगलय् सार्वजनिक चःबिया विषयय् अनुसन्धान प्रकाश अमात्यं यानादीगु खः ।स्वनिगःया दक्वं सार्वजनिक चःबिया अवस्थाया बारे स्थलगत अध्ययन यानादीम्ह वय्कलं अध्ययनया क्रमय् चःबिया ल्याः म्हो जूगु व दुगु चःबिया अवस्था नं तसकं खराब दुगु धयादिल । सार्वजनिक तःबिया जिम्मेवारी स्थानीय तहया जूसां नं स्थानीय तहं व्यवस्थापनय् चिउताः मतःगु वय्कःया धापू दु ।
अथे हे ध्यबा म्हया वयाच्वंपिंसं नं व्यवस्थापनय् खास हे चिउताः मतःगु वय्कःया द्वपं दु ।सार्वजनिक चःबि येँ मनपाया छु शाखां स्वयेगु खः धइगु बारे यकीन मजूगुलिं न्ह्याबलें नं दूरावस्था वयाच्वंगु वय्कलं धयादिल । ‘सार्वजनिक चःबि बांलाक, यचुपिचु यानाः संचालन याइम्हेसित सिरपाः बीगु व फोहर याइम्हेसित दण्ड बीगु व्यवस्था नं जुइमाः’, वय्कलं धयादिल ।
येँ महानगरपालिकां चालु आर्थिक दँय् चःबि दयेकेत छगू करोड न्यय्गू लाख विनियोजन याःगु दु । थुलि ध्यबां पीगू सार्वजनिक चःबि निर्माण यायेगु महानगरपालिकाया योजना दु ।
LEAVE YOUR COMMENTS