ने. सं. ११४३ तछलागा चौथी -

स्वतन्त्र मेयरतय्त थाकुया वल

येँ (नेपालभाषा टाइम्स)- वंगु स्थानीय निर्वाचनय् राजधानी येँ महानगरपालिका लगायत देय्या छुं महत्वपूर्ण नगरपालिकाय् स्वतन्त्र उम्मेदवारतय्सं मेयर पद त्याकूगु खःसां आः वयाः धाःसा थ्व स्वतन्त्रतय्त ज्या यायेत थाकुया वइगु संकेत पिहां वःगु दु । वय्कःपिं मेयर पदय् बहाली जूगु १०० न्हु क्यने न्ह्यः हे थज्याःगु संकटया संकेत खने दया वःगु खः ।

येँ महानगरपालिकाया मेयर पदय् स्वतन्त्रं त्याःम्ह बालेन्द्र साहयात थौंकन्हय् फोहोरया समस्यां दकलय् अप्वः पिरे याना हःगु दु । वय्कलं मतगणनाय् थः न्ह्यःने लायेवं हे फोहोरया समस्या निं समाधान यायेगु धकाः पहल यानादीगु खःसां आः वयाः थ्व समस्या समाधान जुइगु सिबें नं झन स्वतुमतु स्वया वनीगु संकेत खने दया वःगु दु ।

पुलांगु ल्याण्डफिल साइट सिसडोलय् आः फोहोर वाये फइगु अवस्था मदुसा न्हूगु ल्याण्डफिल साइट बञ्चरेडाँडाया स्थानीय जनतां फोहोर वाके बी मखु धकाः पना बीधुंकूगु दु । निथासं फोहोर वाये मफुगु कारणं येँय् हानं थाय्थासय् फोहोर द्वँ चिनेगु शुरु जूगु दु । फोहोरया समस्यां यानाः मेयर साह थौंकन्हय् तसकं तनावय् लानाच्वंगु खँ नं मनपाया कर्मचारीतय्सं धयाहःगु दु ।

मनपा सूत्रया कथं मेयर साहं आः तक छुं नं न्हूगु योजना आरम्भ यानादीगु मदुनि । वय्कः न्हूगु ज्या शुरु यायेगु सिबें नं गबलें यम बुद्धया झ्वाता व गबलें वज्राचार्य समुदायया मुकुटया कारणं विवादय् लायेगु जुयाच्वंगु दु ।

उखे धरान उपमहानगरपालिकाय् नं स्वतन्त्रं त्याःम्ह मेयर हर्क साम्पाङयात धमाधम ज्या यायेत थाकुया वःगु दु । थौंकन्हय् कार्यपालिकाया बैठक च्वंक्वपतिकं विवाद जुइगु कारणं यानाः मेयर साम्पाङया नं तनाव शुरु जूगु दु ।

म्हिगः एमालेया वडा अध्यक्षतय्सं बैठक बहिष्कार यायेवं कार्यपालिकाया बैठक तकं च्वने मफुत । मेयर हर्क साम्पाङं बैठक बहिष्कार यायेमाःगु कारण छु खः धकाः न्यंगु खःसां वडा अध्यक्षतय्सं छुं लिसः मबीवं बैठक सञ्चालन याये मफुगु खः । धरानय् एमाले वडा अध्यक्षतय् बहुमत दु । बैठकय् छुं ई न्ह्यः बिसिउँ वंगु बराह सहकारी बारे नं सहलह यायेगु ग्वसाः दुगु खः । बराह सहकारी बिसिउँ खँय् उपमहानगरपालिकां वास्ता मयाः धासें निक्षेपकर्तातय्सं मेयर साम्पाङ विरुद्ध नाराबाजी यासें ज्याकुथिइ तोडफोड समेत याःगु खः ।
एमाले वडा अध्यक्षतय्गु बैठक बहिष्कार लिपा मेयर साम्पाङं एमालें थ्व ठीक मयाःगु व थुकिं धरानया विकासय् लिच्वः लाकीगु खँ धयादीगु दु ।

थ्वहे झ्वलय् प्रमुख प्रतिपक्षी नेकपा (एमाले) या अध्यक्ष केपी ओलीं स्वतन्त्रतय्सं निन्हु प्यन्हु मनोरञ्जन याः वयेवं तुं देश विकास जुइ मखु धयादीगु दु । पार्टीया छगू ज्याझ्वलय् न्ववासें वय्कलं विचार व गन्तव्य बिनाः स्वतन्त्र जुयाः देश विकास याये मफइगु खँ धयादीगु खः ।