करिडोर मदयेकूगुलिं ख्वपय् डुबान

ख्वप – हनुमन्ते करिडोर दयेके ज्या दिउगुलिं बस्तीइ लः दुहां वःगु द्वपं स्थानीयतय्सं बिउगु दु । स्थानीयतय्सं धाःकथं हनुमन्त करिडोर दयेके सिधःथाय् लः दुहां मवःसा करिडोर दयेके ल्यं दनिथाय् लः दुहां वःगु खः । सरकारं न्हापांगु चरणय् ८१ करोड लागतय् वंगु मंसिरंनिसें हनुमन्ते करिडोर दयेके ज्या न्ह्याकूगु खः ।

थ्व ज्या असार मसान्त तक क्वचायेकेगु लक्ष्य तयातःगु खः, तर करिडोर निर्माण ज्या दीवं बस्तीइ लः दुहां वयेगु समस्या जूगु खँ धाःगु दु ।
सूर्यविनायक नगरपालिका व मध्यपुर थिमि नगरपालिकां वि.सं. २०२१ या नापी कथं खुसिया बहाव व्यवस्थापन यानाः ल्याण्ड पुलिङ्गपाखें समस्या समाधान यायेगु सम्झौता याःगु खःसां ब्लक कारखाना थ्यनेवं करिडोर दयेके ज्या दिउगु खः ।

बिहिवाःनिसें वःगु वां यानाः ब्लक कारखाना क्वय्या लागाय् लाःगु फुक्क धइथें बस्ती डुबानय् लाःगु खः ।स्थानीयतय्सं भूमाफियातय्सं जग्गा हड्पे यायेगु ताः तयाः करिडोरया ज्या हे रोके याका बिउगु द्वपं बियाच्वंगु दु । ख्वपया सांसद महेश बस्नेतं सीमित स्वार्थया निंतिं करिडोर दयेके ज्या दिकूगुलिं ख्वप डुबानय् लाःगु खँ धयादीगु दु ।